Трамп трансгендерлердің спорттық жарыстарға қатысуына тыйым салды

АҚШ президенті Дональд Трамп трансгендер адамдарды қыз-келіншектер спортына қатыстырмау туралы жарлыққа қол қойды, деп хабарлайды 24kz. 

Сөйтіп, жынысын өзгерткендердің спорттық жарыстарда бақ сынауын заңмен шектеді. Бұл қадамды жақтаушылар мұны әділдіктің бастамасы деп қолдаса, қарсы тарап адам құқын бұзумен тең деп сынап жатыр. 

Әсия Нұрлыбаева, тілші: 

- Бұл – америкалық кәсіби велосипедші Кристен Уорли. Жылдар бойы әйелдер спортына қатысып, түрлі додаларда топ жарып жүрген Кристеннің спорттағы кәсіби мансабы аяқталуы мүмкін. Өйткені Трамптың тыйымы алдынан кесе көлденең шыққан. Бірақ Кристен бұған мойымайтынын айтады. 

Кристен Уорли, кәсіби велосипедші: 

- Біз биліктің және АҚШ президентінің трансгендер адамдардың құқын таптап жатқанына куә болып отырмыз. Бұл топтағы адамдардың үлесі Америкада халықтың 0,01%-ін ғана құрайды. Бұл өте аз. Сол себепті біз Үкіметтің бұл қадамымен келіспейміз. 

Трамп болса, өздерін қоғамның тең мүшесі санайтын трансгендер адамдарға қатысты тоқетерін айтып, құжатты ресми бекітті. Бірақ ел арасында дау әлі тарқамай тұр. Әсіресе, Уорли сияқты жынысын өзгертіп үлкен спортқа ден қойғандар наразы. 

Карли Уэбб, кәсіби спортшы, журналист: 

- Жас трансгендерлер үшін бұл елең еткізер жаңалық болды. Олар бізге қарсы соғыс ашты. Бұл әрине, осы топтағы адамдардың психикасына кері әсер етеді. Сондықтан үнсіз қала алмадым. 

Наразылыққа қарамастан Ақ үй қожайыны да алғанын қайтпайтынын жеткізді. Жынысын ауыстырғандардың бәрі спорттан шеттетілетінін жасырмай айтты. Жауаптыларға білім ұйымдарында бастаманы таныстыру жұмыстарын жүргізуді тапсырды. 

Дональд Трамп, АҚШ президенті: 

- Өзін қыз деп таныстырып, спорттық сайыстарда бақ сынап жүрген ерлер 3500 рет жеңіске жетті. Бұл өте көп. Олар әйелдерге арналған 11 мыңнан астам жарысқа қатысқан.

Сондай-ақ Трамп осы айда кәмелетке толмаған балаларды химиялық кастрациялауға және хирургиялық ота жасатуға тыйым салды. Тіпті өздерін әйелмін деп таныстырған трансгендер адамдарға ел аумағына кіруге шектеу қойды. Осылайша, Трамп жыныс ауыстыру мәселесін түп-тамырымен жоюды көздеп отыр.