В Атырау 0 
31 қаңтарда Жайық-Каспий облысаралық бассейндік балық шаруашылығы инспекциясының Теңіз және Дамба балық инспекциялары, сондай-ақ Балық шаруашылығы бөлімінің қызметкерлері Каспий теңізінің оң жақ жағалауында заңсыз балық аулауға қарсы рейд жүргізді.
Рейд барысында инспекция мамандары мекеменің 4 квадроцикл, 3 пикап автокөлігімен мұз үстіндегі барконьерлердің ізіне түсіп, заңбұзушылықтарды анықтады.
- Сағат 14:00-ден 18:00-ге дейін Мартыши-Жанбай аймағынан, мұз астына заңсыз орнатылған 43 дана иесіз ау тәркіленді. Олардың ішінен ұзындығы 50 метр болатын бекіре балығын аулауға арналған 2 ау және қарабалық аулауға арналған 41 ау жинап алынды. Тәркіленген ау құралдарынан 50 кг қарабалық алынып, «Тлекші» ЖШС мекемесіне тапсырылды. Сонымен қатар, бір бекіре балығының шабағы тірі күйінде суға жіберілді, - деп хабарлады инспекцияның баспасөз қызметі.
Балық шаруашылығы инспекциясы балық қорын қорғауға қатысты шараларды тұрақты түрде жалғастыратынын мәлімдеді.
Нұрбейбіт НҰҒЫМАНОВ