Астананың кейбір сауда желісінде картопты шектеп сатып жатыр

Астанада «Small» және «Spar» сауда желілерінде 5 келіден артық картоп сатып алуға уақытша шектеу қойылды, деп хабарлайды Kazinform.

Бұл туралы қалалық инвестициялар және кәсіпкерлікті дамыту басқармасы хабарлайды.

— Елордада картоптың бағасын тұрақтандыру үшін барлық қажетті шаралар қабылданды. Картоп жетіспеушілігі байқалмайды. Өнім қаланың сауда желілері мен базарларда жеткілікті көлемде және қор уақтылы толықтырылып отырады, — делінген хабарламада.

Дегенмен елорданың инвестициялар және кәсіпкерлікті дамыту басқармасы кейбір сауда желісінде картоптың шекті көлемде сатылып жатқанын растады. 

— Өнімді жаппай сатып алуды болдырмау және халықты қамту мақсатында «Small» және «Spar» сауда желілерінде картопты сатуға уақытша шектеу енгізілді, яғни бір адамға 5 келіден артық сатылмайды, — дейді мекемеден.

Бұған дейін Мәжіліс депутаты Айдарбек Қожаназаров елде картоп бағасының күрт өсуін Үкіметтің былтырғы қателіктерімен байланыстырған болатын.