Сарытоғай ауылына Пшен есімді ерікті итке арналған мүсін орнатылмақ

Атыраулық мүсінші Азамат КЕНЖЕҒАЛИЕВ бүкіл елдің сүйіктісіне айналған ерікті ит Пшеннің құрметіне ескерткіш жасады. 

Естеріңізге салсақ, Пшен 28 қарашада Махамбет ауданы Сарытоғай ауылында ит аулаушының жебесінен қаза тапқан еді. Сол күні аулау қызметіне шағым түскен: Қожабеков көшесіндегі аулаға бірнеше ит кіріп кетіп, балалар үйден шығуға қорыққан. Қызметкерлердің бірі найза қолданып, Пшенды өлімші етіп жаралаған. 

Пшен ауылдың нағыз мақтанышы болды. Ол берілген бұйрықтарды түсініп, салынып жатқан бөгетке құм салынған қаптарды тасымалдауға көмектескен видеосы арқылы қазақстандықтардың жүрегін жаулап алған еді. Бұл әрекеті оны адалдықтың символына айналдырды.

Металл композициясы Пшен мен оның ерлігін паш ету арқылы  жануарларға мейірімділік пен қамқорлықтың қаншалықты маңызды екенін еске салады. 

– Біз оны су тасқыны кезінде көрдік, мейірімді, сүйкімді ит ретінде есте қалды. Оның өлтірілгенін естігенде, жүрегім қатты ауырды. Жанынан өтіп бара жатқан жандар оның жақсылығын еске алып, суретке түсу үшін ескерткіш жасауды жөн көрдім. Ескерткіш көшеге қойылса, жан-жануарлардың мейірімділігін ұмытпас үшін естелік пен құрмет белгісіне айналады. Бұл жай ит емес-ті – ол облыстың көптеген тұрғындары секілді бөгет салуға атсалысып, өзінің болмысымен халықты шабыттандырған еді, - дейді А.Кенжеғалиев. 

Азамат Индер ауданының орталығы – Индербор кентінде тұрады. Жасы 45-те, Батыс Қазақстан облысы, Жаңақала ауданында туып-өскен. 1989 жылы Атырау облысына қоныс аударған. Ол өз шеберханасында темірден түрлі мүсіндер жасайды. 

Азаматтың таныстары ескерткішті Пшен туып-өскен ауылдың көшелерінің біріне орнатуды, тіпті осы мақсатқа қаражат жинауды да ұсыныпты. 

 – Айтайын дегенім, мен мұны ақша үшін жасамаймын. Жұмысым шын жүректен жасалған, тек дүниеде осындай мейірімді ит өмір сүргенін және кішкентай достарымызға қамқорлық жасау, оларды қорғау қаншалықты маңызды екенін ұмытпасақ деймін, - дейді Азамат.

Айнұр САПАРОВА