Ақша бопсалап, алаяқтықпен айналысқан: Қазақстанда жалған полицейлер қаптап барады

Қазақстанда өздерін полицей ретінде таныстырып, ақша бопсалаған, сол сияқты «қамқорлық» көрсетіп, алаяқтықпен айналысқан 14 адам ұсталды. Бұл туралы Azattyq Rýhy агенттігі ІІМ-нің баспасөз қызметіне сілтеме жасап хабарлайды.

Белгілі болғандай, Шымкентте бір топ адам полиция қызметкерлерінің кейпіне еніп, «қамқорлығы» үшін ай сайын 1,5 млн теңге алып отырған. Олар осы айда қолға түсті.

Дәл сол сияқты Ақтөбеде екі жас жігіт қаланың екі тұрғынына зорлық-зомбылық көрсетіп, 300 мың теңге алған.

Ал Қонаевта ұйымдасқан қылмысқа қарсы күрес басқармасының қызметкерлері Алматы облысының екі тұрғынын ұстады. Олар өздерін жедел уәкіл ретінде көрсетіп, жәбірленушіден 500 мың теңге бопсалаған. Жалған қызметтік куәліктер, құжаттар және нысанды киім тәркіленді. Күдіктілер қамауға алынды.

«Айта кету керек, заманауи технологиялар алаяқтарға ықтимал құрбандар туралы әртүрлі ақпаратты оңай алуға мүмкіндік береді. Бұл олардың қылмыстық схемаларын сенімді етеді. Қылмыскерлер адамдарды манипуляциялау үшін психологиялық әдістерді қолданады. Жалған полиция қызметкерлерін ұстау – бұл қауіпсіздік мәселесі ғана емес, азаматтардың құқықтарын қорғаудың маңызды бөлігі. Азаматтардың қырағылығы мұндай қылмыстардың санын едәуір төмендетуі мүмкін. ІІМ кез келген заңсыз әрекеттер туралы полицияға дереу хабарлауды сұрайды. Бұл бағыттағы профилактикалық жұмыстар жалғасуда», – деді ІІМ ұйымдасқан қылмысқа қарсы күрес департаментінің өкілі Қуандық Алпыс.