Индер ауданында қосымша екі канал тартылып жатыр

Индер аудандық ауыл шаруашылығы бөлімінің басшысы Мәмбетқали Құсайыновтың айтуынша, каналдардан егін шаруашылығы мен төрт түлікке су алынады. 

Индербор кенті және Бөдене ауылдық окуругіне қарасты «Алғабас-Жорық» каналы 1968 жылдан бері жұмыс істеп тұр.  Каналдың бойын мекендеген 15 шаруа 119 гектар жерге егін  салып, жеміс ағаштарын өсіруге пайдаланып отыр. Ұзындығы 64,7 шақырымды құрайтын суару-суландыру жүйесіне жөндеу жұмыстары жүргізілуде. 

Ал Көктоғай ауылдық окуругінің аумағындағы «Ақсай» каналының бойында 7 кәсіпкер 164 гектарға егін егіп отыр. 80 шақырым болатын каналды жөндеу жұмыстары 2022 жылы басталған. Қос  арнаны жөндеу жұмысы жыл соңына дейін аяқталады деп жоспарланып отыр. 

- Аталған округтердегі төрт-түліктің бәрі осы каналдардан  су ішеді. Себебі құмдағы құдықтардың суы тартылып, ашып кеткен. Тағы 2 каналды қазып, судың өту қабілетін арттыруға тырысып жатырмыз. Олар: ұзындығы 102,3 шақырым «Бағырлай» және 51,7 шақырым ға созылып жатқан «Құрайлы Сай» . Бұл екі каналды жөндеу жұмысы толықтай келер жылы аяқталады деп жоспарланып отыр, -   деді Мәмбетқали Құсайынов.

Индер ауданы әкімдігінің мәліметінше аталған аталмыш каналдарға жөндеу жүргізуге 3 млрд 100 мың теңге бөлінген. 

-  Екі каналды жөндеу жұмыстары биыл жыл соңында аяқталса, қалған екі каналды тереңдету жұмыстарын келесі жылы аяқтау жоспарланған, -деді әкімдіктің баспасөз қызметі.

Нұрбейбіт НҰҒЫМАНОВ