В Атырау +16.7 
Қазақстандағы ең ірі полипропилен өндіру зауытын басқаратын «Kazakhstan Petrochemical Industries Inc.» (KPI) ЖШС-нің жаңа бас директоры болып Жанайдар Жандельдинов тағайындалды. Ол бұған дейін Румыниядағы «Петромидия» мұнай өңдеу зауытында және «ҚазМұнайГаздың» халықаралық құрылымдарында басшылық лауазымдарды атқарған.
Кәсіпорын ұжымына жаңа басшыны «ҚазМұнайГаз» ҰК» АҚ Мұнай өңдеу және мұнай-химия департаментінің директоры Саятай Әліпбаев таныстырды.
Жанайдар Жандельдиновтың алдына газ-химия кешенінің тұрақты әрі үздіксіз жұмысын қамтамасыз ету, операциялық тиімділікті, технологиялық процестердің сенімділігін және шығарылатын өнімнің сапасын арттыру бойынша міндеттер қойылды.
Павлодар МӨЗ операторынан Румыниядағы зауыт басшысына дейін
Жанайдар Жандельдинов еңбек жолын 2008 жылы Павлодар мұнай-химия зауытының технологиялық қондырғылар операторы болып бастаған.
Кейіннен осы кәсіпорында жаңа техника мен технологияларды енгізу жөніндегі инженер, сондай-ақ жетекші инженер-технолог болып жұмыс істеді.
2008 жылы С. Торайғыров атындағы Павлодар мемлекеттік университетін «Органикалық заттар мен материалдардың химиялық технологиясы» мамандығы бойынша бітірді. 2010 жылы осы мамандық бойынша магистр дәрежесін алды.
2014 жылдан бастап мансабын KMG International халықаралық құрылымында жалғастырды.
Әр жылдары Румыниядағы KMG Rompetrol SRL компаниясының «Петромидия» мұнай өңдеу зауытында инженер-жобалаушы, инжиниринг бөлімінің бастығы, өндіріс жөніндегі директор және бас директордың орынбасары лауазымдарын атқарды.
Жаңа тағайындауға дейін Жандельдинов KMG Rompetrol SRL өндіріс және өнеркәсіптік қызметтер жөніндегі бас директоры болып жұмыс істеді.
Осылайша, KPI-дың жаңа басшысының технологиялық қондырғыларда тікелей жұмыс істеудің де, ірі мұнай өңдеу кәсіпорындарының өндірістік процестерін басқарудың да тәжірибесі бар.
KPI зауыты туралы не белгілі?
«Kazakhstan Petrochemical Industries Inc.» ЖШС Қазақстандағы полипропилен өндіретін алғашқы интеграцияланған газ-химия кешенін басқарады.
Кәсіпорын Атырау облысында, «Ұлттық индустриялық мұнай-химия технопаркі» арнайы экономикалық аймағының аумағында орналасқан.
Зауыт 2022 жылдың қараша айында пайдалануға берілді. Оның жобалық қуаты жылына 500 мың тонна полипропиленді құрайды.
Кәсіпорын өнімі қаптамалар, құбырлар, тұрмыстық бұйымдар және полимерлерден жасалатын басқа да тауарларды өндіру үшін қолданылады. Полипропилен қазақстандық өңдеушілерге де, экспортқа да жеткізіледі.
Полипропилен өндірісі артып келеді
KPI бұрын жариялаған мәліметтерге сәйкес, 2026 жылдың жеті айында кәсіпорын 248,4 мың тонна полипропилен шығарды.
2025 жылдың осыған ұқсас кезеңінде өндіріс көлемі 219 мың тоннаны, ал 2024 жылы 150 мың тоннаны құраған еді.
Осылайша, екі жыл ішінде қаңтар–шілде айларындағы өндіріс көлемі 65%-дан астамға өсті.
Компания, сондай-ақ, отандық өңдеушілермен ынтымақтастықты кеңейтіп, ішкі нарыққа полипропилен жеткізу үшін қоймалар желісін дамытып келеді.
Кәсіпорынның жаңа басшылығының алдында өндіріс тұрақтылығын сақтау, жабдықтардың жұмыс тиімділігін арттыру және кешенді әрі қарай дамытуды қамтамасыз ету міндеті тұр.