Қазақстан туристік тұрғыда ең арзан елдердің қатарына кірді

2024 жылғы қолжетімді бағыттар рейтингінде біздің еліміз екінші орынды иеленді. Зерттеуді HelloSafe аналитиктері жүргізді. Олар 136 елдің тұрғындары мен тамақтану, көлік шығындарын бағалады. Бұл туралы Stan.kz ақпарат агенттігі КТК телеарнасына сілтеме жасап хабарлайды.

Мәліметтерге сенсек, ең арзан ел ретінде Лаос аталды. Онда турист күн сайын шамамен 6 мың теңге жұмсайды. Қазақстан екінші орында, ал елімізге келген туристке күніне 9 мың теңгеден сәл аз жұмсау керек. Үшінші орынды Руанда мен Гана бөлісіп тұр.

Сонымен қатар сарапшылар қай елдерге саяхаттау ең қымбатқа түсетінін анықтады. 
Бірінші орында Барбадос тұр, бұл елдің қонақтарына күн сайын 160 мың теңгеден астам қаржы жұмсауға дайын болу қажет. 

Еуропа елдері арасында ең қымбаты Швейцария. Мұнда күнделікті бюджет 127 мың теңгеге жуықтайды.

Еске салайық, бұған дейін биыл туристік жолдама қымбаттағанымен қазақстандықтар Түркияға саяхаттап бару бойынша рекорд жаңартқанын жаздық. Маусым айының қорытындысы бойынша Түркияға туристік жолдама бағасы жылдық мәнде 28,5%, шілдеде 35,5%, тамызда 39,3% көтерілген. Нәтижесінде маусым-тамыз айларында Қазақстан азаматтарының Түркияға 440,4 мың рет барғаны белгілі болды.