Атырау ветеринариялық инспекциясының басшысы пара алғаны үшін сотталды

Оған қоса тағы бес адам, оның ішінде бас ветеринариялық инспектордың батысқазақстандық әріптесі де сотқа тартылды.

Атырау қалалық №2 сотының мәліметінше, Атырау облыстық ветеринариялық инспекциясының басшысы лауазымды тұлға бола тұра жалпы қамқорлығы үшін бірнеше рет ЖК директорынан 1,4 миллион теңге, шаруа қожалығының басшысынан 500 мың теңге пара алған. 

Оған қоса тағы бес адам бірқатар қылмыстық құқық бұзушылық бойынша сыбайлас жемқорлыққа қатысты сотталды: бір адам алдын ала сөз байласу арқылы адамдар тобында пара алуды ұйымдастырып, елеулі мөлшерде бірнеше рет пара алған.

Екі адам алдын ала сөз байласу арқылы адамдар тобында пара алғаны үшін, тағы екеуі лауазымды тұлғаға қомақты көлемде пара бергені үшін сотталды.

Іс материалдарына сүйенсек, облыс бойынша ветеринариялық бақылау және қадағалау инспекциясының басшысы БҚО инспекциясының бас маманымен және ветеринариялық инспекторымен алдын ала сөз байласу арқылы ЖК директорынан жалпы қамқорлығы үшін 1,8 млн теңге пара алуды ұйымдастырған. 

ЖК директоры және ШҚ басшысы ҚР шекарасында көліктің заңсыз қозғалысы үшін пара ретінде 3,3 млн теңге мен 500 мың теңгені жеке өздері берген.  

Сотталушылардың кінәсі сотталушылардың, куәлардың айғақтарымен, ақша қаражатын аудару туралы түбіртектермен, тергеу әрекеттерінің бейнежазбаларымен, мамандардың қорытындыларымен дәлелденді.

Инспекция басшысы 7 жыл 6 айға бас бостандығынан айырылды. 

Бас маман мен ветеринариялық инспекторға пара сомасының 60 еселенген мөлшерінде айыппұл тағайындалды. 

ЖК және ШҚ басшыларына - пара сомасының 26 еселенген мөлшерінде айыппұл салынды.

Барлығы мемлекеттік қызметте және мемлекеттік ұйымдарда қызмет атқару құқығынан өмір бойына айырылды. 
Сот үкімі заңды күшіне енген жоқ. 

Анастасия ШЕРСТЯНКИНА