Air Astana Атырауға қайтып оралуға мәжбүр болды

Бүгін, 16 қыркүйекте «Air Astana» әуе компаниясы орындайтын «Атырау-Алматы» бағытындағы №878 рейс 11:05-те Атыраудан ұшып, 30 минуттан соң қайтадан Хиуаз Доспанова атындағы Атырау халықаралық әуежайына оралуға мәжбүр болды. 

Нақты себебін түсінбеген жолаушылар редакцияға хабарласып, анық-қанығын білуді өтінген еді. 

Әуе компанияның анықтама бөлімінен білгеніміздей, ұшақ өндірістік қажеттікке байланысты қайта оралуға мәжбүр болған.

 - Себебі жолаушылардың қауіпсіздігі бірінші орында, -деп түсіндірді компанияның өкілі. 

"АЖ" редакциясына да нақты не болғанын айтпады. Ал, Атырау халықаралық әуежайының анықтама бөлімі №878 рейс сағат 15:30-ға дейін кешіктірілгенін хабарлады.

Нұрбейбіт НҰҒЫМАНОВ