Башар Асад: Ресейлік С-300 кешендері Сирияға жеткізілді

АСТАНА. 31 мамыр. ҚазАқпарат - Сирия Президенті Башар Асад Ресейден С-300 зенитті-зымыранды кешендерінің алғашқы топтамасы келгенін мәлімдеді, деп хабарлады ВВС  «Аль-Манар» телеарнасына сілтеме жасап.

«Сирия ресейлік зениттік зымырандардың алғашқы топтамасын алды. Қалған кешендер жақын арада жеткізіледі»,-деді саясаткер.

Сейсенбіде Ресей сыртқы істер вице-министрі Сергей Рябков С-300 тұрақтандыру факторы болып табылатынын, себебі, қақтығысқа араласуға ниеттілердің бұл қадамын болдырмауға ықпал ететінін айтқан еді. Дипломат  сол кезде Дамаскіге кешендерді жеткізу мерзімін нақты айтпады.

Бұдан бұрын Франция, АҚШ және Израиль  Мәскеуге сириялық әскерге қару жеткізуден тартынуға шақырған болатын.

Дереккөз: inform.kz