Ресейдің арзан сүті емес, өз өніміміз болуы керек

28 қыркүйекте Сауда және интеграция министрі Арман ШАҚҚАЛИЕВ Атырауға жұмыс сапарымен келді. Ол жергілікті кәсіпкерлермен кездесіп, жеке қабылдау өткізіп, сосын БАҚ өкілдері үшін брифинг өткізді. Біз отандық тауар өндірушілердің мүддесі шетелдік өндірушілер демпингінен қалай қорғалатынын сұрадық. Бірнеше ай бойы жергілікті сөрелерде ресейлік тауарлардың, атап айтқанда сүт өнімдерінің саны айтарлықтай көбейді.

Біздің сауалымызға министрліктің баспасөз қызметі жазбаша жауап берді. Олардың мәліметінше, Сауда және интеграция министрлігінің базасында барлық өнімді бақылаушы органдардың өкілдерінен тұратын ішкі нарықты қорғау жөніндегі ахуалдық штаб құрылған. «Мемлекеттік органдардың өзара іс-қимыл алгоритмі әзірленді және ішкі нарықты қорғау жөніндегі шаралар әзірленуде».

- Осы алгоритм шеңберінде Денсаулық сақтау министрлігі сынамаларды сараптау нәтижелері бойынша 5 кәсіпорын өндіретін сүт өнімдеріндегі май-қышқыл құрамы бойынша сәйкессіздіктерді анықтады («Южный сүт зауыты» ЖШС, «Саратов сүт комбинаты» ЖШС, «А-7 Агро-Орынбор сүт комбинаты» ЖШС, «Энгельский сүт комбинаты» ЖШС және РФ «ВБД» АҚ), - деп атап өтті баспасөз қызметі. – Шекарада күшейтілген зертханалық бақылау жүргізу шеңберінде «Саратов сүт комбинаты» ЖШС (РФ) өндірген «Добрая буренка» майының 3,2% ультрапастерленген сүтіндегі май-қышқыл құрамының сәйкессіздігі қайта анықталды. 

Осы кәсіпорынның өнімдерін Қазақстан аумағына әкелу уақытша шектелген. Барлығы, биылғы жылдың мамыр айынан бастап Сауда және интеграция министрлігі сүт өнімдеріне сәйкестік туралы 62 декларацияның күшін жойды. Күшін жою себептері - май-қышқыл құрамы бойынша техникалық регламенттің талаптарына сәйкес келмеуі, сондай-ақ аккредиттелмеген сынақ зертханаларында немесе ЕАЭО бірыңғай тізіліміне енгізілмеген зерттеулерді жүргізу бөлігінде рәсімдерді бұза отырып сәйкестік декларацияларын тіркеу. 

- Осыған ұқсас жұмыс өнімнің басқа түрлеріне қатысты жоспарлануда, - деді министр. – Осы шаралардың барлығы Қазақстан нарығына сәйкес келмейтін сападағы арзан ресейлік ауыл шаруашылығы өнімін импорттық жеткізуді төмендетуге ықпал етеді. Сауда желілері мен бөлшек сатушыларының өкілдерінен арзан импорт түскен кезде отандық өндірушілердің ынтымақтастық қағидатын көргім келеді және импорттық өнім бойынша сәйкессіздіктерді анықтау туралы уәкілетті органдардың хабарламаларына белсенді жауап бергім келеді.

Дайындаған Айнұр САПАРОВА