В Атырау
+11 
«Самұрық-Қазына» жалғыз акционері – Үкіметке 302 млрд теңге дивиденд төледі. Бұл туралы аталған қордың экономика және қаржы жөніндегі директоры Назира Нұрбаева мәлім етті, деп хабарлайды ҚазАқпарат.
«Қордың дивиденд саясатына сәйкес, Үкіметтің тапсырмасы бойынша қордың әлеуметтік жобаларды қаржыландыру көлемін есепке алғандағы жыл сайынғы дивиденд мөлшері қордың жүйе құраушы компаниялардан алатын дивидендтерінің 50 пайызына тең. 2022 жылы дивиденд саясатының орындалуы - 124 пайыз, яғни тиесілі 245 млрд теңгенің орына акционерге төленген жалпы сома 302 млрд теңге болып отыр», - деді ол қорда өткен баспасөз мәслихатында.
Оның атап өтуінше, 2021 жылы дивиденд саясатының жаңа әдістері қабылданған сәттен бері жалғыз акционердің пайдасына аударылған төлем мөлшері 2 есеге артты.
«Жалғыз акционерге төленген 302 млрд теңгеден бөлек, қор тобы ірі салық төлеуші саналады. 2022 жылдың нәтижесінде төленген салық сомасы - 1,7 трлн теңге. Бұл - 2021 жылғы көрсеткіштен 529 млрд теңгеге артық», - деді Назира Нұрбаева.