В Атырау
+24 
«Атырау облысы Су арнасы» КМК Табиғи монополияларды реттеу комитетінің Атырау облысы бойынша департаментіне алдағы 5 жылға су тарифін көтеру туралы өтініммен жүгінді. Қазір Атырауда бір текше метр үшін тариф 64 теңге. Өтінімдегі тариф өсімі 100% құрайды.
ТАРИФТІ КӨТЕРУДЕН ТҮСКЕН АҚША ҚАЙДА ЖҰМСАЛАДЫ?
Осыған орай кәсіпорынның цехтарына баспасөз туры өтті. Шақырылғандар қатарында журналистерден бөлек антимонополия органының басшысы Әлібек ТӨЛЕП, облыстық және қалалық мәслихат депутаттары да болды.
- Біз өтінім бердік және тарифтің көтерілетініне үміттенеміз. 2015 жылдан бері тариф өскен жоқ, осы 7 жылда 2 есеге жуық төмендеді! Ал баға көтеріліп жатыр. Ал мұндай жағдайда толыққанды қалай жұмыс істеуге болады? – дейді «Атырау облысы Су Арнасы» директоры Арман КЕНЖЕҒАЛИЕВ. – Компания инвестициялық бағдарламаны орындауы керек. Бірақ тарифтің төмендеуі және коммуналдық қызметтердің, соның ішінде «Атырау Жарық» қызметтерінің 25 пайызға дерлік қымбаттауы инвестициялық бағдарламаны жүзеге асыруға кері әсерін тигізуде.
Оның айтуынша, бүгінде кәсіпорынның табысты бөлігі тек өз қажеттіліктерін: жалақыны, салықтарды, коммуналдық қызметтерді және басқа да аударымдарды өтейді. Ал өтемдік тарифтің енгізілуіне байланысты кәсіпорын жұмысшыларының жалақысын көтеру мүмкін емес, бұл кадрлардың жұмыстан кетуіне әкеледі. Сонымен қатар кәсіпорын бірнеше жүздеген шақырымдық қараусыз қалған су желілеріне қызмет көрсетеді.
Былтыр сот шешімімен Әуезов даңғылындағы «АОСА» әкімшілік ғимараты тәркіленіп, саттыққа шығарылып, сатылған болатын. Сол кезде кәсіпорын өз аумағында тағы бір кеңсе салды, гараждарды жөндеп, оған абоненттік қызметтерді көшірді. Бұл ретте олардың бірінің бірінші қабатында арнайы техникалар жөнделеді. Осы себепті бақылаушылар қыста суықтан және пайдаланылған газдан зардап шегеді. Олар үшін тағы бір кеңсе керек.
– Инвестициялық бағдарламадан түскен ақшаға ысырма, техника сатып аласыздар, мен мұнымен келісемін. Бірақ кеңсе саламыз дейсіздер, бұған рұқсат беруі екіталай, - деді Ә.Төлеп.
- Біз кеңсе салу үшін өтінімге түзету енгізгіміз келеді. Оны бізге 580 миллион теңгеге салып береміз деп уәде берді, – деп жауап берді А.Кенжеғалиев.
– Бүкіл инвестициялық бағдарлама тек ғимарат құрылысына жұмсалады, ал ысырманы жеткізуге ештеңе қалмайды. Айтпақшы, неге облыстық тұрғын үй-коммуналдық шаруашылық басқармасына жүгінбейсіз? — деп сұрады Ә.Төлеп.
– «Атырау облысы Су арнасы» осы жылдан бастап шығынмен жұмыс келеді. Оның үстіне кәсіпорынды, былайша айтқанда, құрал-жабдық жеткізушілер тонап келеді. Бір фирма бізге 16 миллион теңге қарыз болды, сосын бірден істен шығатын Қытайдың 20 ысырмасын әкелді. Біз оларды сотқа бердік. Қазір сот процесі жүріп жатыр. Сөйте тұра бізді инвестициялық бағдарламаны орындамады деп айыптады, - деп сөзін жалғастырды А.Кенжеғалиев. - Міне, қабырғаның қасында тұрған самосвалдарды, қытайлық вакуумдарды қараңыз. Оталдыру тетігі жұмыс істемейді, оларды іске қосу үшін «КамАЗ» дизель отынын жағады. Жабдықтардың 80 пайызы жарамсыз, тендерлерді Астанада өткізетіндіктен осылай болып жатыр. Тұрғындарға да көмек көрсетіп жатырмыз – Дамбыда су тазарту жүйесі жөнделді, Еркінқаладан да соны салғалы жатырмыз.
КСС ҚАЙТА ЖАРАҚТАУДЫ ҚАЖЕТ ЕТЕДІ
Турға қатысушылар Балықшы кентіндегі ауыстыру торабына барды. Мұнда ысырмалар Данияда жасалған, кепілдігі 10 жыл болатын осындай басқару торабымен ауыстырылады. Рас, мұндай агрегаттарды ауыстыру үшін түнде қаладағы суды толығымен өшіру керек. Одан кейін Балықшыда «Ландыштың» артында орналасқан кәріздік сорғы станциясында (КСС) болдық. Су арнасы қызметкерлерінің айтуынша, Атырауда 85 КСС болса, оның 45-і апатты жағдайда, себебі көпшілігі кеңес дәуірінде салынған. Қазір КСС-ларында техникалық тексеру жүргізілуде. Ақау ведомствосы жасалады. Бірақ қазірдің өзінде КСС толық қайта жарақтауды қажет етеді деп айтуға болады: құрылымның өзі, құбырлар, электр бөлігі, шахталарға апаратын баспалдақтар - бәрі жарамсыз күйде тұр. Кейбір КСС екінші сорғыны орнатуды қажет етеді.
Одан әрі делегация су тазарту құрылыстарын аралады. Мұнда бәрі дерлік – су алу, сорғы, сүзгі станциялары, коллекторлар қайта жарақтауды қажет етеді. Түбіндегі шөгінділерді құрғату станциясының құрылысын аяқтау қажет.
Қалалық құрылыс бөлімі келесі жылы бюджет қаражатына 1-учаскеде орналасқан су тазарту станциясы аумағында қуаттылығы тәулігіне 60 мың текше метр су өткізетін №6 жаңа сүзгі стансасын және су алатын жүзбелі сорғы станциясын салуды жоспарлап отыр.
Еске салсақ, 5-ші сүзгі стансасы 2011 жылы салынған. Бірақ құрылыс кезінде жіберілген заң бұзушылықтардың кесірінен көп ұзамай оның жұмысы тоқтатылды. Қалалық құрылыс бөлімі қуаттылығы тәулігіне 50 000 текше метр болатын станцияны қайта жарақтауға тапсырыс берді. «БатысАльянсСтрой» ЖШС қайта жарақтау жұмыстары бойынша өткізілген конкурста жеңіп, жұмыстарын бастап кетті. Бұл жұмыстар келесі жылы аяқталуы керек.
Мұрат СҰЛТАНҒАЛИЕВ