Атырау, 6 желтоқсан 03:17
 ашық В Атырау -10
$ 420.79
€ 511.98
₽ 5.67

Рамзан Қадыров сиқыршылармен күресуге шақырды

1 908 рет қаралды
АСТАНА. 14 ақпан. ҚазАқпарат - Аймақ әкімшілігінің сайтында жарияланған үндеуінде Шешенстан Республикасының президенті Рамзан Қадыров (суретте) бақсы-балгерлер мен сиқыршылардың жолын кесіп, қызметін тоқтатуды талап етті.  

«Алаяқтар адамдардың көз жасы мен азап-мехнатын пайдаланып, күн көруді әдетке айналдырған. Қарақан бастарының қамы үшін ештеңеден тайынбайды. Білімі мен білігі жоқ олар былайғы жұртты «ауруыңнан айықтырамыз» деп, алдап-сулап, қалтасын қағады. Ондай алаяқтардың құрығына тек аңқаулар ғана емес, сонымен бірге, басына күн туып, жаны қиналғандар да түсіп жатыр», - депті Шешенстан басшысы.

muslim.kz  сайтының жазуынша, Грозный қалалық әкімшілік өкілдерімен және білім беру мекемесінің басшыларымен кездесуінде Рамазан Қадыров ондай алаяқтардың діннің атын жамылып, әрекет ететінін алға тартты. Алаяқтармен күресуде қалалық әкімшілік пен құқыққорғау орындарының және діни мекемелердің жұмысын үйлестірудің маңыздылығына тоқталды. «Аңқау елге арамза молда» болып, «қой терісін жамылған қасқырлар» қоғамға үлкен қауіп төндіретіндіктен, оларға қарсы идеологиялық күресті күшейтуге шақырды.

Бұл кездесуге, сонымен бірге, «қызметіңді өсірем», «отбасыңдағы жағдайды реттеймін», «ауруыңнан айықтырамын» деп адамдарды алдап, ақша тауып жүрген тұрғындар да шақырылды. Олардың кейбіреуі өздерін «шейхпіз», «көріпкелміз» деп сендірген. «Халық емшілері» бірде-бір аятты немесе дұғаны білмейтін болып шықты.

Рамзан Қадыров оларды исламға жат, заңға қайшы бұл жолдан бас тартуға шақырды. Сондай-ақ, бұған құлақ аспағандарды заңмен қудалайтынын да қатаң ескертті. Сөзінің соңында мұндай алаяқтардың кесірінен талай отбасының ойраны шығып, шаңырағы шайқалғанын айтты.

Дереккөз: inform.kz

14 ақпан 2013, 10:30

Қате таптыңыз ба? Тінтуірмен белгілеп, Ctrl + Enter түймесін басыңыз.

Осы мақала тақырыбына қатысты ой-пікіріңізбен бөлісіп, бейнежазба жолдағыңыз келсе, WhatsApp +7 707 37 300 37 нөміріне және editors@azh.kz поштасына жібере аласыз.