"Мемлекетшілдіктің озық үлгісін көрсетті" - Тоқаев Әлихан Бөкейхан туралы

Президент Қасым-Жомарт Тоқаев қоғам қайраткері, "Алаш" партиясы көшбасшыларының бірі Әлихан Бөкейханның 155 жылдығы туралы айтты, - деп хабарлайды Tengrinews.kz тілшісі.

"Бүгін – тарихи тұлға Әлихан Бөкейханның туғанына 155 жыл. Ол – халқымыздың біртуар перзенті, Алаш қозғалысының негізін қалаушы. ХХ ғасыр басында Әлихан бастаған қазақ зиялылары ұлттық мүдде жолында аянбай еңбек етіп, мемлекетшілдіктің озық үлгісін көрсетті",- деп жазды Президент Twitter-парақшасында.

Айта кетейік, бүгін көрнекті қоғам және мемлекет қайраткері, ұлт-азаттық және Алаш қозғалысының жетекшісі, Алашорда өкіметінің төрағасы, публицист, ғалым Әлихан Бөкейханның туған күні. Ол бұрынғы Семей облысындағы Қарқаралы уезінің Тоқырауын болысы, қазіргі Қарағанды облысының Ақтоғай ауданында туған.