«Жаужүрек Мың бала» фильмі АҚШ-та про­катқа шығады

Бұл жөнінде Ш.Айманов атындағы «Қазақфильм» киностудиясының президенті Ермек Аманшаев мәлімдеді.

«Айқын» газетінің жазуынша, алдағы уақытта Нью-Йоркте, Лос-Анджелесте фильмнің көрсетілімі болады. Ал ақпан айында фильм ресми түрде прокатқа шығарылмақ. «Қазақфильмнің» соңғы жылдардағы жемісіне айналған ки­нотуынды «Оскарға» да ұсынылған бола­тын.

 «Қазір іріктеу жұмыстары жүріп жа­тыр. Бүгінгі күнге дейін дауыс беретін ака­демия мүшелеріне арнайы бес көрсе­ті­лім жасадық. Қорытындысы жаңа жылдан кейін шығады. «Оскардың» лонг-лист, шорт-лист деген номинациялар бар. Шорт-листке дүние жүзінен 72 фильм түсті, оның ішінде «Жаужүрек Мың бала» бар. Егер ондыққа іліксек, алғашқы қадам ретінде жақсы оқиға болар еді. Үмітіміз бар», -  деп атап өтті Ермек Аманшаев.

Егер кинотуынды үздік ондықтың қа­тарына іліксе, бұл қазақ киносы тарихын­дағы тың серпіліс болар еді.
Тағы бір айта кетерлігі, келер жылы Ақан Сатаевтың «Жаужүрек Мың бала» кинотуындысының негізінде анимациялық хикая да түсірілмек.

«Тек қана түсіріп қой­май, персонаждардың қуыршақтарын шығару, шамамыз келсе, компьютерлік ойындар қалыптастыруды жоспарлап отыр­мыз. «Жаужүрек Мың бала» фильмінің беделі арқасында болу керек, бүгінгі күні қомақты қаржы бөлетін инвесторлар да табылып жатыр», - деді Ермек Аманшаев.

Дереккөз: ҚазАқпарат