SpaceX кемесі Халықаралық ғарыш станциясымен тұңғыш рет түйісті

Америкалық SpaceX жекеменшік корпорациясының Crew Dragon ғарыш кемесі 3 наурызда Халықаралық ғарыш станциясымен алғаш рет түйісті. Кеме мен станцияның түйіскен сәті америкалық ғарыш агенттігі NASA-ның Youtube-каналында тікелей эфирде көрсетілді.

Түйісу процесі толықтай автоматты түрде жүргізілді – кеме бортында экипаж жоқ.

NASA-ның айтуынша, бұл – жеке компания құрастырған, халықаралық ғарыш станциясымен түйіскен тұңғыш кеме. Кеме орбитада шамамен бір апта уақыт кідіреді. Содан соң Жерге оралады.

NASA жоспары бойынша, Crew Dragon және Boeing компаниясының кемелері 1960 жылдары құрастырылған ресейлік "Союз" кемелерін алмастыруы тиіс. Әзірге "Союз" - Халықаралық ғарыш станциясына ғарышкерлерді тасып жатқан жалғыз кеме.

Capture confirmed! After making 18 orbits of Earth since its launch, @SpaceX’s #CrewDragon spacecraft successfully attached to the @Space_Station via “soft capture” at 5:51am ET while the station was traveling just north of New Zealand. Watch: https://t.co/oJKHgK8eV7 pic.twitter.com/xO1rU5cAMM

— NASA (@NASA) 3 марта 2019 г.

"Союз" арқылы Америка ғарышкерлерін Халықаралық ғарыш станциясына жеткізіп, әкелу бойынша Ресей мен АҚШ арасындағы келісім-шарттың мерзімі 2019 жылы сәуір айында аяқталады.

Америкалық Business Insider басылымының дерегінше, 2008 жылы Ресей тарапы NASA-дан кемедегі бір орын үшін 21,8 миллион доллар алған. Он жыл ішінде баға 372 пайызға өскен. Ғарышкерлерді Халықаралық ғарыш станциясына жеткізгені үшін АҚШ Ресейге 12 жыл ішінде 3,36 миллиард доллар төлеген.

Дереккөз: Азаттық радиосы