​Ресейде 14 тіл жойылып кеткен

Ресейде соңғы 150 жылда 14 тіл жойылған. Халықаралық «Ресейдегі байырғы халықтар тілдері жылының» ашылуына арналған баспасөз мәслихатында Ұлттар істері жөніндегі федералдық агенттіктің басшысы Игорь Баринов осындай деректі келтірді, деп хабарлайды ТАСС. 

«Жаһандану үдерісі Ресей Федерациясын да шет айналып өткен жоқ. Ол ұсақ тілдердің жойылу қаупін арттырып отыр. Біздің филолог ғалымдарымыздың есебі бойынша, Ресейде 150 жылда 14 тіл өлген», - дейді Баринов. 

Байырғы халықтар тілдерінің халықаралық жылы 2019 жылдың 28 қаңтары күні Париж қаласында басталды. Ал жылдың Ресейдегі ресми ашылу салтанаты Юграда наурыз айында болады. БҰҰ деректеріне сүйенсек, әлемде байырғы халықтар өкілдерінің жалпы саны 370 миллион шамасында, олар 90 елде тіршілік кешіп жатыр.

Дереккөз: inform.kz