Ашық есікке кіріп, обырға шалдыққандарын білді

21-26 қаңтарда Атырау облыстық онкологиялық диспансерінде жатыр мойны обырының алдын алу және ерте анықтау бойынша Ашық есік күндері өтіп, үш әйелден қатерлі ісік анықталды.

- Бұл күндері бізден 166 әйел тексеруден өтті. Олардың 55-інен қатерсіз ісік, 78-інен – астарлас ауру анықталды, - дейді онкодиспансер директорының орынбасары Эльмира САПАРОВА.

Онкологтардың айтуынша, әйел 40 жасқа толған кезде жатыр мойны обырына шалдығу қаупі артады екен.

- Бұл аурудың ерте сатысында клиникалық көріністер болмауы мүмкін. Назар аударатын және дереу дәрігерге бару қажет белгілер – қан кету немесе жыныс жолдарынан өзгеше бөліндінің бөлінуі, сондай-ақ, іштің төменгі жағының, белдің ауырсынуы, - дейді Сапарова.

Бүгінде онкодиспансерде 4 мыңдай облыс тұрғындары есепте тұр.

Фархат ӘБІЛОВ

Суретті түсірген автор