Құрманғазы ауданында оқушы екпеден кейін есінен танған

23 қаңтарда Атырау облысы Құрманғазы ауданы Ақкөл ауылындағы мектепте АДС-М екпесі (сіреспе мен дифтерияға қарсы) салынған 4 оқушы өзін нашар сезініп, 11 сыныптың бір оқушы қызы есінен танып қалған. Жедел жәрдем шақырылып, оқушылар аудандық ауруханаға жеткізілген. Жағдайы түзелген үш оқушыға медициналық көмек көрсетіліп, , біреуін санавиациямен облыстық ауруханаға жіберген.

- Оған  компьютерлік томография жасалды. Құрысу белгілері байқалмады, тек аяқ-қолы шамалы тартылған. Дәрігерлер жасөспірімнің жағдайы қауіпті емес екенін,  кешенді тексеру жұмыстары жүріп жатыр,- деп хабарлады Құрманғазы аудандық орталық ауруханасының директоры Гүлшара МҮТИЕВА.

«АЖ» тілшісі оқушының анасы Жаңылсын ҒҰБАШЕВАМЕН хабарласты. Оның айтуынша, қызының бұрын еш жері ауырмаған, ешбір науқастар тізімінде болмаған.

Атырау облыстық денсаулық сақтау басқармасының хабарлауынша,  Құрманғазы ауданында аталған екпе өткен жылдың қазан айынан бері салынып жатыр. Ауданға 800 доза екпе жеткізілген. Бүгінге дейін 220 жасөспірімге екпе салынған. Бұған дейін ешкімнің денсаулығында асқыну  байқалмаған. Облыс бойынша осы сериядағы вакцинаның 30800 дозасы алынған. Бүгінде мұның 50%-ы салынды,  денсаулығына шағымданғандар болған жоқ. 

Ләззат ҚАРАЖАНОВА