Бизнес – класс!

Жаңа жыл алдында дәстүрлі өтетін «Жыл кәсіпкері-2018» байқауында балық кәсіпшілігімен айналысып, елімізді және алыс-жақын шетелді балық өнімдерімен қамтамасыз етіп жүрген «Амангелді» өндірістік кооперативінің директоры Мұрат ӘМІРҒАЛИЕВ жеңіске жетті. 

«Салтанат сарайында» өткен салтанатты рәсім басында облыс әкімі Нұрлан НОҒАЕВ сөз сөйлеп, 22 кәсіпкерге, соның ішінде 2016 жылдан бастап «Жарқыра» бағдарламасына қаражат бөліп, әлеуметтік кәсіпкерлікті дамытуға үлесі үшін «Тенгизшевройл» ЖШС-ке алғыс хаттар тапсырды.

 «Сәтті старт» номинациясында махамбеттік «Нұр Риза» ЖШС-нің директоры Нұрлыбек БИСЕМБИЕВ жеңімпаз атанса, ауданда денсаулық сақтау саласына қосқан үлесі үшін қызылқоғалық кәсіпкер Саламат ЕСҚАЙЫРОВ және аудан халқын таза ауыз сумен қамтығаны үшін құрманғазылық кәсіпкер Ақылбек ҚУАНЫШАЛИЕВ аталып өтті.

«Үздік жас кәсіпкер» номинациясын ‘Dental Angels’ стоматологиясының директоры Парасат БОЛАТОВ алды.

Атырау тұрғындарына Қиғаш өзеніндегі лотос гүлдеріне, Хан ордалы – Сарайшыққа экскурсия ұйымдастырып жүрген  «Планета кз» ЖШС «Туризм саласының үздігі»  номинациясына лайық деп танылды.

«Үздік отбасылық бизнес» номинациясын қаламызды абаттандырумен айналысатын «Жер Ана» ЖШС-нің директоры Жұмабек ШАМЕНОВ иеленді.

«Сауда саласының үздігі» номинациясында Мақат ауданында саудасын дөңгелетіп отырған   «Держава-К» дүкендер желісінің директоры Бағытжан ТӨЛЕУОВ жеңіске жетті.

«КазПако» ЖШС директоры Азамат АМАНЖОЛОВ «Үздік  өндіруші» номинациясын жеңіп алды.

Облыста 23 214 бизнесмен әйел бар, осылардың ішінде миялылық мал сою цехының директоры Айжан ІЗІМОВА жылдың «Үздік кәсіпкер әйел» атанды.

Бизнесмендердің табыстарын еселеуге ақыл-кеңес беретіндер де жүлдеден құр қалмады:  «Үздік бизнес жаттықтырушы» номинациясын Арман АЗАМАТОВ иеленді.

Кеш соңында «Мисс Қазақстан-2018» байқауының жеңімпазы Альфия ЕРСАЙЫН бастаған сәнгер қыздар мұнайлы астананың дизайнерлерінің қолынан шыққан киім үлгілерін көрсетті. Кешке қатысушылар бір-біріне «кәсібіңіз өркендеп, саудаңыз ортаймасын» деп тілек айтысып, тарқасты.

Фархат ӘБІЛОВ 

Суретті түсірген автор