Атырау, 18 қараша 16:33
 дождьВ Атырау +3.4
$ 443.96
€ 487.73
₽ 5.38

АМӨЗ мұнай өңдеу көлемін арттырып, ауаны ластауды азайтпақ

33 рет қаралды

Атырау мұнай өңдеу зауыты биылғы 10 айда 4,7 миллион тонна мұнай өңдеп, жеңіл мұнай өнімдерін шығару үлесін 80,5 пайызға жеткізді. Кәсіпорында іске асырылып жатқан инфрақұрылымдық жобалар зауыттың жылдық өңдеу қуатын 5,5 миллионнан 6,7 миллион тоннаға дейін ұлғайтуға мүмкіндік береді.

Бұл туралы «ҚазМұнайГаз» ҰК АҚ Басқарма төрағасы Асхат Хасеновтің Атырау МӨЗ-ге жасаған жұмыс сапары барысында белгілі болды.

Кәсіпорынның өндірістік көрсеткіштеріне сүйенсек, қаңтар–қазан айлары аралығында зауытта 1,6 миллион тоннадан астам автобензин, 1,7 миллион тоннадан астам дизель отыны және 190 мың тоннаға жуық авиаотын өндірілген. Шикізат өңдеу тереңдігі 91 пайыздан асса, дизель отынын өндірудің орташа тәуліктік көрсеткіші 6,6 мың тоннаны құрап отыр.

Қазіргі уақытта Атырау МӨЗ-де 17 стратегиялық және инвестициялық жоба жүзеге асырылуда. Солардың бастысы — зауытты үш жылдық үздіксіз жөндеуаралық кезеңге көшіру. Бұл бағыттағы 47 іс-шараның 36 пайызы орындалды. Сонымен қатар жеңіл мұнай өнімдерін құю эстакадасын қайта жарақтандыру, сыртқы электр желілерін реконструкциялау, резервтік газтурбиналық электр станциясы мен жаңа теміржол инфрақұрылымын салу жұмыстары қатар жүргізіліп жатыр.

Зауыт өндірісті кеңейтумен қатар экологиялық жобаларға да басымдық беріп келеді:

  • Шығарындыларды азайту: Факел газдарын қайтару блогы салынуда. Жыл соңына дейін 75 резервуардың 71-іне понтон орнату жоспарланған, бұл көмірсутек шығарындыларын 90 пайызға дейін азайтады.

  • Ауа сапасын бақылау: Төрт экологиялық бекетте қосымша газ талдағыштар орнатылуда. Бекеттердегі ауа сапасының деректері Атырау МӨЗ сайтында жарияланып, әр 20 минут сайын «Қазгидрометке» тікелей жіберіліп отырады.

  • Кадр даярлау: Білікті мамандар тарту мақсатында колледж бен ЖОО түлектеріне арналған «Атырау МӨЗ-нің тағылымгері» арнайы бағдарламасы іске асырылуда.

Сапар қорытындысы бойынша «ҚазМұнайГаз» басшысы Асхат Хасенов зауыт басшылығына инвестициялық жобаларды бекітілген мерзімде аяқтауды, өндірістік қауіпсіздікті қамтамасыз етуді және өндіріске цифрлық технологияларды енгізуді тапсырды.

Бүгін, 15:26

Қате таптыңыз ба? Тінтуірмен белгілеп, Ctrl + Enter түймесін басыңыз.

Осы тақырыпқа қатысты бөлісетін жаңалық болса, бізге хабарласыңыз. Ақпарат пен видеоны Телеграм арнамызға және editor@azh.kz жіберіңіз.