Ирикла су қоймасынан Жайыққа секундына 139 текше метрге дейін су жіберіліп жатыр

15 ақпаннан бастап Ресейдің Орынбор облысындағы Ирикла су қоймасынан Жайық өзеніне су жіберу көлемі секундына 139 текше метрге дейін ұлғайтылды.

Бұл туралы «Қазсушар» РМК Батыс Қазақстан филиалы директорының міндетін атқарушы Рауан Хусаинов хабарлады.

Бұған дейін бір ай бойы секундына 90 текше метрге дейін су жіберіліп тұрды. «Қазсушардың» мәліметінше, бүгінгі күні су қоймасы 82,5%-ке толған, бұл ретте бос көлемі 570 млн текше метрге жетеді.

Хусаинов атап өткендей, ағымдағы гидрологиялық режимге сәйкес 15 наурызға қарай су қоймасындағы су көлемін 950 млн текше метрге дейін жеткізу жоспарланып отыр. Салыстыру үшін: 2024 жылы Ирикла су қоймасынан суды максималды жіберу секундына 2 170 текше метрге жетті, ал өткен жылғы су тасқыны кезінде — секундына 201 текше метрді құрады. Егер Жайыққа судың келуі секундына 1 800 текше метрден асатын болса, судың жайылмаға шығуы және саяжай алаптарының су басуы мүмкін.

Алдын ала болжам бойынша, ағымдағы жылы Ирикла су қоймасына судың келуі 0,7-ден 1,3 млрд текше метрге дейін күтіледі, орташа көп жылдық көрсеткіш 1,22 млрд құрайды. 2025 жылы болжам 1–2 млрд текше метрді құрады, іс жүзінде 1,180 млрд текше метр түсті.

Бұған дейін 15 қаңтардан бастап су қоймасынан секундына 90 текше метр көлемінде су жіберілгені хабарланған болатын.