В Атырау +4 
Мюнхен әуежайында дрондардың бірнеше рет табылуына байланысты барлық рейстер уақытша тоқтатылды. DFS (Германия әуе қозғалысын басқару қызметі) бұл шешімді бейсенбі күні кешкісін қабылдады, деп хабарлады АА әуежайға сілтеме жасап.
Салдарынан 17 ұшып шығатын рейс тоқтатылды, ал 15 келетін рейс Штутгарт, Нюрнберг, Вена және Франкфурт қалаларына бағытталды. Бұл шамамен 3 мың жолаушыға әсер етті.
Әуежай мәлімдемесінде дрондарды анықтау және жою — федералдық және жергілікті полицияның құзыретінде екенін атап өтті. Жолаушылар әуежай терминалында орындармен, көрпелермен, сусындар мен жеңіл тамақпен қамтамасыз етілді.
Бұған дейін бірнеше Еуропа елдері, соның ішінде Польша, Румыния, Латвия, Эстония және Дания, дрондардан туындаған әуе кеңістігі бұзылуы туралы хабарлаған. Кейбір дрондар Ресей өндірісінен деп көрсетілген, бірақ Ресей өз қатыстылығын жоққа шығарды.