В Атырау +3 
Атырау облысында 5 қазан – Ұстаздар күніне орайластырылған «Ұстазыма алғыс!» апталығы бастау алды. Игі дәстүрге айналған бұл шараның алғашқы күнінде ардагер педагогтерге құрмет көрсетіліп, арнайы марапаттар табыс етілді.
Іс-шараны облыстық Білім беру басқармасы ұйымдастырды. Басқарма басшысы Марат Әбуов ардагер ұстаздарды арнайы шақырып, олардың еңбегіне ризашылығын білдірді.
– «Ұстаз – ұлт болашағын тәрбиелейтін ұлы тұлға. Біздің әрқайсымыздың өмірімізде ерекше орны бар ұстаздарымыздың берген білімі мен тәрбиесі қызметтік жолымызда бағыт-бағдар болып келеді. Бүгінгі мереке қарсаңында ұстаздарымызға шынайы алғыс айтамыз. Сіздердің еңбектеріңіз әрқашан шәкірттердің жетістігімен бағалана берсін», – деді ол құттықтау сөзінде.
Кездесу барысында педагогикалық еңбек жолында өшпес із қалдырған ұстаздарға жылы лебіздер айтылып, құрмет көрсетілді. Барлығы 13 ардагер ұстаз алғыс хаттармен және естелік сыйлықтармен марапатталды.
29 қыркүйек, 15:24