В Атырау +4 
Араб елдері Израильдің Газа секторындағы соғысын «дереу тоқтатуды» талап етті. Бұл туралы Парсы шығанағы араб мемлекеттері ынтымақтастық кеңесінің (ССАГПЗ) атынан Кувейттің ұлы ханзадасы Сабах Халид әл-Хамед ас-Сабах хабарлады, деп жазады АА.
Ханзада Сабах атап өткендей, Газадағы трагедия екі жылдан астам уақыт жалғасуда. Қорғалмаған палестина халқы қатаң және әділетсіз блокада, қиратулар мен ауыр қасіреттерге ұшырап отыр. Осы уақыт ішінде 60 мыңнан астам бейкүнә адам – көбінесе әйелдер мен балалар – қаза тапты. Сабах бұл жағдайды "геноцид пен этникалық тазарту мысалы" деп атап, БҰҰ Қауіпсіздік Кеңесін дереу шабуылдарды тоқтатуға, гуманитарлық көмекке қолжетімділікті қамтамасыз етуге және бейбіт тұрғындарды қорғау үшін нақты шаралар қабылдауға шақырды.
Мысырдың БҰҰ-дегі тұрақты өкілі Усама Абдулхалик өзінің елінің Газа секторында атысты тоқтатуды қолдайтынын айтып, Израильдің соғысты жалғастырудағы позициясына қарамастан, жағдайды тоқтату қажеттігін баса айтты.
Палестинаның БҰҰ-дегі өкілі Рияд Мансур: «Палестиналықтар өмір сүруге, еркіндік пен абыройға ие. Израильдің Газадағы зорлық-зомбылығы ақталмайды. Бізге геноцид, күшпен көшіру, отарлау мен оккупацияға жол берілмесін» деді.
Араб мемлекеттері лигасының Бас хатшысы Ахмед Абу Гейт өз сөзінде Газадағы жағдайдың бұрын-соңды болмаған қатыгездік екенін атап, мақсат – палестин қоғамын жойып, жерді өмір сүруге жарамсыз ету арқылы тұрғындарды кетуге мәжбүрлеу деп мәлімдеді. Ол Қауіпсіздік Кеңесін бүгін әрекет етуге және Газаны қалпына келтіруге шақырды: «Балаларға олардың лайықты балалық шағын қайтарыңыздар» деді Абу Гейт.