В Атырау +2 
Атырауда облыстық перинаталдық орталық толық жөндеуден екі жыл өткен соң, ғимараттың қасбетін қайта бояу жұмыстары басталды.
Қала тұрғындары арасында көп сынға ұшыраған сұр-қара түсті ғимарат енді ашық қызғылт-сары түске боялады.
Қала тұрғындары бұл түнеріңкі түстердің перзентханаға – өмір, үміт пен жылулық орнауы тиіс мекемеге сай емес екенін бұрыннан айтып келеді. Алайда ғимараттың түсін өзгерту себептері мен қаржыландыру көзі әзірге белгісіз.
«Ақ Жайық» редакциясы облыстық денсаулық сақтау басқармасына түсініктеме сұрап хабарласқанымен, ведомство: «Қазір ешкімге түсініктеме бермейміз» деп қана жауап берді.
Осынау «жас» ғимаратқа неліктен қайта бояу қажет болды және жаңа түс таңдауда кім шешім қабылдады? Бұл үшін қайтадан бюджет қаражаты пайдаланылған болуы да мүмкін.
Денсаулық сақтау органдарының жабықтығы таң қалдырады: бұл жеке меншік нысан емес, әлеуметтік маңызды объект. Мұндай жағдайда ашықтық қалыпты жағдай болуы тиіс, өйткені бұл салық төлеушілердің қаражаты мен қоғамның билікке деген сеніміне қатысты мәселе.
Айгүл МАНСУРОВА