​Өңір диқандары 100 мың тоннадан астам өнім жинады

Өңірде 4 мыңға жуық шаруа қожалығы тіркелсе, оның 280-нен астамы егін шаруашылығына маманданған. Биылғы маусым басталғалы жалпы көлемі 104,5 мың тонна өнім алынды, деп хабарлайды Өңірлік коммуникациялар қызметі.

Жиналған өнімнің ішінде:

• 48,6 мың тонна – көкөніс,
• 35 мың тонна – бақша өнімдері,
• 5 мың тонна – картоп,
• 16 мың тонна – мал азығы.

Аймақтағы егіс көлемі жалпы 9,3 мың гектарды құрайды.

Маусымдық өнімдерді тек жергілікті тұрғындарға ғана емес, көршілес өңірлерге де жеткізіп отырған шаруашылықтардың бірі – Махамбет ауданындағы «Агрофеликс» қожалығы. Мұнда 100 гектар жерге егін егілген.

– Қазір пияз, сәбіз, қырыққабат, картоп жиналуда. Жұмысқа 40-тан астам адам тартылды. Жоспар бойынша науқан қараша айында толық аяқталуы тиіс, – деді қожалық агрономының көмекшісі Александр Хан.

Жиналған өнімдер тікелей тұрақтандыру қорына жеткізіліп, сұрыпталғаннан кейін қала мен аудан дүкендеріне төмен бағамен саудаланатын болады.