В Атырау +4 
Атырауда қуаттылығы жылына 1,25 млн тонна полиэтилен өндіретін зауыт құрылысы аясында «Жергілікті құндылық – ортақ даму» форумы өтті.
Іс-шараға Атырау облысы әкімінің орынбасары Марат Мурзиев, «ҚазМұнайГаз» ҰК» АҚ басқарма төрағасы Асхат Хасенов және 500-ден астам қазақстандық компания өкілдері қатысты.
Форумды «Силлено» ЖШС, Tecnimont (MAIRE) және Sinopec Shanghai Engineering Corporation (SSEC) ұйымдастырды.
– «Силлено» полиэтилен зауыты өңір экономикасына жаңа серпін беріп, жергілікті кәсіпорындардың бәсекеге қабілеттілігін арттырады әрі жаңа жұмыс орындарын ашады. Жергілікті қамтуды дамыту – біздің басты басымдықтардың бірі, – деді Марат Мурзиев.
Форум барысында «Силлено» компаниясы Мұнай-газ машина жасау саласын дамытуға арналған халықаралық орталыққа қосылу туралы келісімге қол қойды. Бұл қадам қазақстандық өндірушілерге жаңа мүмкіндіктер ашпақ.
Сондай-ақ EPC-мердігерлердің бірі – италиялық Tecnimont қазақстандық түлектерге арналған арнайы білім беру бағдарламасын іске қоспақ. Жоба аясында төрт жыл ішінде техникалық оқыту жүргізіліп, үздік түлектерге Атыраудағы зауытта жұмыс істеу мүмкіндігі ұсынылады.