В Атырау +2 
2025 жылғы 4 қыркүйекте Қазақстан Республикасы Сауда және интеграция министрлігі мен Alibaba компаниясының өкілдері электрондық сауданы дамыту мәселелерін талқылау үшін кездесті.
Кездесуге Қаржы министрлігінің Мемлекеттік кірістер комитеті және «Qaztrade» сауда саясатын дамыту орталығының өкілдері де қатысты.
Қазақстан бұл салада тұрақты өсім көрсетіп отыр: 2024 жылы онлайн-сатылым көлемі 3,2 трлн теңгеге жетіп, бөлшек сауданың 14,1%-ын құрады.
Кездесу барысында тараптар B2B және B2C форматындағы электрондық сауданы реттеу, шағын және орта бизнес үшін арнайы B2B-маркетплейс құру сияқты ынтымақтастық бағыттарын қарастырды.
Сонымен қатар, биыл Қазақстан мен Қытай Халық Республикасының Сауда министрліктері арасында қол қойылған өзара түсіністік Меморандумын іске асыру мәселесі де талқыланды. Бұл құжат цифрлық экожүйені дамытуға, экспорттық әлеуетті арттыруға және шетелдік компанияларды тартуға бағытталған.
Сауда және интеграция министрлігі электрондық сауда саласында ашық диалог пен бірлескен жұмысты жалғастыруға дайын екенін растады.