В Атырау +4 
Келесі аптада Бейжіңде Екінші дүниежүзілік соғыстың аяқталғанына 80 жыл толуына орай салтанатты әскери парад өтеді, деп хабарлайды Евронью́с.
Оған Ресей президенті Владимир Путин, Беларусь басшысы Александр Лукашенко және Солтүстік Корея лидері Ким Чен Ын қатысады. Батыс елдерінің лидерлері шақырылмаған.
Солтүстік Корея лидері Ким Чен Ын бұл сапарымен 2019 жылдан кейін алғаш рет шетелге шығатын болады. Ол Қытай төрағасы Си Цзиньпиннің шақыруымен парадқа қатыспақ. Парад рәсімі 70 минутқа созылып, Халық-Азаттық армиясы дәстүрлі әскер түрлерімен қатар заманауи қарулар, танктер, авиация және дрондарды көрсетеді.
Парад алдында Владимир Путин Шанхай ынтымақтастық ұйымының саммитіне қатысу үшін Тяньцзинь қаласына барады. АҚШ пен Батыс Еуропа елдерінің лидерлері қатыспайды, бұл Ресейдің Украинадағы соғысына байланысты пікір айырмашылықтарымен түсіндіріледі.
Соңғы жылдары Солтүстік Корея Ресеймен ынтымақтастықты күшейтіп, әскери және материалдық қолдау көрсетіп келеді, бірақ Қытаймен қарым-қатынасты да жақсартуға тырысуда. 2023 жылы Солтүстік Кореяның сыртқы саудасының 97%-ы Қытайға тиесілі болған.
Бұл сапар Ким Чен Ыннің халықаралық аренада белсенділігін арттыруға және Солтүстік Кореяның басты серіктестерімен байланысын нығайтуға бағытталған қадам болып отыр.