В Атырау +2 
Атырауда жаңа оқу жылы басталар алдында мектептердің айналасындағы жол инфрақұрылымы мен оқушыларды тасымалдауға арналған автобустар тексерілді, деп хабарлайды Polisia.kz.
Атырау қаласы полиция басқармасының әкімшілік полиция бөлімінің жол-техникалық инспекциясы жүргізген тексерудің басты мақсаты – оқушылардың мектепке барып-қайту кезіндегі қауіпсіздігін қамтамасыз ету.
Барлығы 40 мектеп автобусы қаралды, оның ішінде 11-інде ақаулар анықталып, жүргізушілерге ескерту берілді. Кемшіліктерді жою жұмыстары 1 қыркүйекке дейін толық орындалуы тиіс.
Сонымен бірге мектеп маңындағы жол белгілері мен жол таңбалары да тексерілді. Анықталған кемшіліктер бойынша жергілікті атқарушы органдарға нұсқамалар беріліп, қазір орындалу сатысында.
– Балаларды тек жарамды көліктермен тасымалдау қатаң бақылауда болады. Жарамсыз көліктерге қатысты нақты шаралар қабылданды, – деді Атырау қаласы полиция басқармасы әкімшілік полиция бөлімінің аға мемлекеттік автоинспекторы Нұрсұлтан Құрақбаев.
Айта кетейік, 1 қыркүйектен бастап қаладағы мектептер маңына орнатылған «Сергек» бейнебақылау кешені жұмысын бастайды. Бұл аумақта көлік қозғалысының жылдамдығы 40 км/сағ болып белгіленді. Полиция жүргізушілерді жол ережесін қатаң сақтауға шақырады.