В Атырау 0 
Қазақстанда ақпараттық қауіпсіздікті нығайту бағытындағы жұмыстар жалғасуда. Осы стратегия аясында елдің Қарулы күштері қызметтік мәліметтерді жіберу үшін отандық Aitu мессенджеріне кезең-кезеңмен көшу процесін бастады.
Бұл шешім Мемлекет басшысының тапсырмасымен қабылданып, шетелдік платформаларды қолданғандағы тәуекелдерді азайтуға бағытталған.
Отандық мессенджерге көшу – мемлекеттік құрылымдарда, оның ішінде қорғаныс саласында қызметтік ақпаратты қорғау деңгейін арттырудың негізгі қадамдарының бірі. Бұған дейін деректерді жіберу үшін көбінесе шетелдік мессенджерлер қолданылып келген, бұл өз кезегінде қауіпсіздікке белгілі бір қатер төндіруі мүмкін еді. Қазақстан юрисдикциясында орналасқан және деректерді сақтау мен өңдеу талаптарына толық сай келетін Aitu мессенджерін пайдалану ақпарат ағынын толық бақылауға мүмкіндік береді.
Қазақстан Республикасының Қорғаныс министрі, авиация генерал-лейтенанты Даурен Косанов, ҚР Қарулы күштерінің барлық бөлімшелерін Aitu мессенджеріне кезең-кезеңмен көшіруді тапсырды. Көшу процесі 2025 жылдың соңына дейін аяқталуы жоспарланған. Бұл кезеңде армияның ұйымдық-штаттық құрылымы мен қолданыстағы байланыс арналары ескеріледі, сондықтан қызметтік процесс бұзылмай, интеграция жүйелі түрде жүзеге асады.
Қорғаныс министрінің цифрландыру жөніндегі орынбасары Дархан Ахмедиев атап өткендей:
«Ұлттық IT-өнімдерді қолдану – цифрлық кеңістіктегі дербестікті қорғауға бағытталған жаһандық үрдіс. Қарулы күштердің Aitu мессенджеріне көшуі қызметтік деректердің сыртқа таралуын болдырмай, ақпаратты тиісті деңгейде қорғауға мүмкіндік береді».
Жаңа мессенджер тек жедел ақпарат алмасу үшін ғана емес, сондай-ақ жиналыстар өткізу мен іс-қимылдарды үйлестіру сияқты кең ауқымды міндеттерді шешу үшін қолданылатын болады. Бұл ішкі коммуникацияны оңтайландырып, қауіпсіздік деңгейін арттырады.