Атырау облысында «Аудан жастары» бағдарламасы жалғасуда

Атырау облысында жас мамандарға қолжетімді тұрғын үй беру мақсатында өңірлік «Аудан жастары» тұрғын үй бағдарламасына өтінімдер қабылдау жалғасуда.

Өтінімдерді 2025 жылғы 14 тамыздан 3 қыркүйекке дейін eatyrau.kz порталы арқылы онлайн беруге болады.

Бағдарламаның шарттары:

• Сыйақы мөлшерлемесі – жылдық 6%;

• Бастапқы жарна – тұрғын үй құнының кемінде 10%;

• Аудан тұрғындары үшін максималды несие сомасы – 15 млн теңге;

• Несие мерзімі – 19 жылға дейін;

• Тұрғын үй тек қатысушының тұрақты тұратын ауданында беріледі.

Қатысу критерийлері:

• Қатысушы Қазақстан азаматы болуы керек;

• Атырау облысында тұрақты тіркеуі болуы қажет;

• Өтінім берген кезде 35 жастан аспауы қажет;

• Қатысушы мен оның отбасы соңғы 5 жылда Қазақстанда тұрғын үйге ие болмауы тиіс;

• Соңғы 1 жыл ішінде үздіксіз ресми еңбек өтілі болуы керек.

Қатысушылар санаты: 

Бағдарлама денсаулық сақтау, білім беру, мәдениет, спорт, ғылым, әлеуметтік қорғау, коммуналдық қызметтер саласындағы мамандарға, сондай-ақ құқық қорғау органдары, «Қазпошта», мемлекеттік БАҚ қызметкерлері, ТЖМ қызметкерлері және тұрғын үй кезегінде тұрған жетімдер мен ата-анасының қамқорлығынсыз қалған жастарға арналған.

Әкімдіктің хабарлауынша, «Аудан жастары» бағдарламасы әсіресе ауылдық жерлердегі жастарға жеңілдетілген шарттармен тұрғын үй алуға және жұмыс орнында тұрақтауға мүмкіндік береді.