В Атырау +3 
Шымкент қаласы әкімінің орынбасары Руслан Берденовке жасалған қастандық ісі бойынша айыпталып жатқан «Тұрғын үй Шымкент» ЖШС-нің бұрынғы басшысы Ернар Жиенбай сотта қызғаныш басты себеп болғанын айтты, деп хабарлайды ҚазТАГ.
«Әйелім Берденовтің туыстарымен араласатын. Оны маған үнемі мысал ететін. «Бұлшық еттері мықты, киімі қымбат» деп айтып отыратын. Жұмыста да қысым көріп жүрдім, жиі қорландым. Ақыры әйелім ажырасуға арыз берді. Ал Берденов оған лайк басып, түрлі мақтаулар жазатын», – деді ол сот отырысында.
Жиенбайдың бұл мәлімдемесі қастандыққа «тұрмыстық сипаттағы жанжал» себеп болды деген алдын ала болжамды растап отыр.
Еске сала кетейік, 21 сәуірде Руслан Берденовке оқ атылып, ол ауруханаға түскен. Күдікті ретінде әкімдікке қарасты кәсіпорын қызметкері ұсталды. Бұл іс бойынша тергеу аяқталып, іс сотқа өтті. Ал шілде айының соңында сот тыңдауы басталған.