​1 немесе 2 қыркүйек пе? Министр мектепте алғашқы қоңырау қашан соғылатынын айтты

Қазақстан мектептерінде Білім күніне орай 2024/2025 оқу жылындағы салтанатты жиындар негізінен 2 қыркүйекте өтеді. Алайда бірінші сынып оқушылары үшін ерекшелік ескерілуі мүмкін.

Бұл туралы Оқу-ағарту министрі Ғани Бейсембаев Үкіметте өткен брифингте хабарлады.

«1 қыркүйекке қатысты барлық шаралар дәстүр бойынша 2 қыркүйектен басталады. Қалаған жағдайда – 1 қыркүйекте де рұқсат береміз. Егер тілек болса, біз тыйым салмаймыз, мүмкіндік береміз – мектептер педагогикалық кеңестің шешімімен 1 қыркүйекте бірінші сынып оқушылары үшін өткізе алады», — деп түсіндірді министр.

Бейсембаевтың айтуынша, бұл мәселе әсіресе бірінші сынып оқушыларының ата-аналары үшін өзекті.

«Бұл маңызды сәт, өйткені балалар алғаш рет мектепке келеді. Бұл өте маңызды және бұл символдық мереке өткізілуі керек», — деп қосты ол.