В Атырау +4 
Бүгінгі таңда алтын елдердің экономикалық тұрақтылығын сақтауда маңызды қаржы құралы болып отыр. Кейбір мемлекеттердің иелігіндегі алтын көлемі таңғаларлық, деп жазады Daily Galaxy. Бұл қорлар ұлттық валюталарды қолдауға ғана емес, жаһандық экономикалық ықпал қалыптастыруға да үлкен рөл атқарады, деп хабарлайды УНИАН.
АҚШ әлемдегі ең ірі алтын қорына ие мемлекет — шамамен 8133,5 метрлік тонна алтын. Бұл қазынаның негізгі бөлігі Кентукки штатындағы Форт-Нокс қамалында сақталады. Қалғаны Денвер және Сан-Францискодағы монеталар сарайында орналасқан.
Бұл қорлар АҚШ экономикасының тұрақтылығын қамтамасыз етіп, доллардың әлемдік резервтік валюта ретіндегі мәртебесін бекемдейді. Сонымен қатар, АҚШ-тың валюта резервтері де әлемдегі ең ірісі — 910 миллиард доллардан асады.
Германияда 3351,5 тонна алтын бар және бұл көрсеткіш бойынша ол екінші орында. Алтын қорының көп бөлігі Франкфуртта сақталғанымен, біраз бөлігі АҚШ пен Ұлыбританияда, бұл — суық соғыс дәуіріндегі стратегиялық сақтандырудың нәтижесі.
Соңғы жылдары Германия өз алтын қорын елге қайтаруға күш салып жатыр, бұл — қоғамдық сенім мен ашықтықты арттыруға бағытталған қадам.
2451,8 тонна алтын қорымен Италия әлемде үшінші орында. Оның басым бөлігі Италия банкінің қоймаларында сақталған, аздаған көлемі Швейцария мен Ұлыбританияда.
Италияның экономикасы экспорт пен туризмге тәуелді болғандықтан, бұл алтын қорлары экономикалық тұрақтандырушы рөл атқарады. Сонымен қатар, бұл қорлар еуроаймақтың қаржылық тұрақтылығына үлес қосады.
Қытай өз алтын қорын 2279,6 тоннаға дейін арттырды. Бұл — юань валютасын нығайтып, АҚШ долларына тәуелділікті азайту стратегиясының бір бөлігі. Бұл қорлар Қытайдың 3,2 триллион доллардан асатын валюталық активтерімен толықтырылып отыр.
Қытай ресми алтын сатып алумен қатар, ішкі өндірісті де ұлғайтып жатыр. Бұл — оның жаһандық қаржы сахнасындағы ықпалын арттыру және өз валютасының тұрақтылығын қамтамасыз ету жолындағы қадамы.
Швейцария, Үндістан, Жапония, Польша және Ұлыбритания да айтарлықтай алтын қорына ие елдер қатарында.
Бұдан бөлек, Батыс Аустралияның Хамерсли аймағынан ғалымдар дүниежүзіндегі ең ірі темір кен орнын тапты. Мұнда 55 миллиард тонна темір кені бар, оның құрамында 60%-дан аса таза темір бар екені айтылған.