Түркияның бір қаласын ​нөсер жаңбыр шайып кетті

Түркияның Трабзон қаласында толассыз жауған жаңбыр салдарынан су тасқыны болып, бір адам із-түзсіз жоғалды. Су деңгейінің күрт көтерілуі ондаған үй мен кәсіпорындарды су басып, жол инфрақұрылымына айтарлықтай зиян келтірді.

Ең көп зардап шеккен аудандар—Беширли мен Молоз. Су тасқыны бизнес орталықтары мен мектептерге, ауруханалар мен автотұрақтарға дейін жетіп, олардың жертөле қабаттарын толығымен су алып кеткен.

Трабзон губернаторы Азиз Йылдырымның айтуынша, жедел жәрдем қызметіне 278 қоңырау түскен, олардың 267-сі Ортакхисар ауданынан тіркелген. Акчаабат ауданында 72 жастағы Хюсеин Айдын есімді ер адам жоғалып, іздестіру жұмыстары басталып кетті.

Апаттың салдарын жою үшін 460-тан астам төтенше жағдайлар қызметі мен коммуналдық құрылым мамандары жұмылдырылды. Оқиға орнында 16 автоцистерна, 20 кәріз жуатын техника, 24 арнайы техника және 50 түрлі көлік жұмыс істеуде.

Қалалық әкімшіліктің мәліметінше, бұл табиғи апат шектеулі аумақта өте қарқынды жауған нөсер жауынның салдарынан туындаған. Ортакхисар мэрі Ахмет Кая бұл жағдайды нағыз табиғи апат деп атап, барлығы 44 ауданнан су тасқыны мен инфрақұрылымның бұзылуы жөнінде хабар түскенін жеткізді.

Айта кетейік, бұған дейін Түркияның Мугла провинциясында магнитудасы 5,8 болатын жер сілкінісі тіркеліп, бір адам қаза тауып, бірнеше тұрғын зардап шеккен болатын. Бұл жағдай елдегі табиғи апаттар қатарының жиілегенін көрсетіп отыр.