В Атырау +4 
2025 жылғы 1 шілдеден бастап «Кеңқияқ – Атырау» магистральдық мұнай құбыры учаскесіндегі ішкі тариф «ҚазТрансОйл» компаниясының табысының төмендеуі аясында экспорттық тарифпен теңестірілді, деп хабарлайды «Нефть и газ Казахстана» Telegram-арнасы.
«ҚазТрансОйл» АҚ «Кеңқияқ – Атырау» мұнай құбыры арқылы Қазақстанның ішкі нарығына мұнай тасымалдау бойынша реттелетін қызметке жаңа тарифтің бекітілгенін хабарлады. Бұл құбырдың операторы – «МұнайТас» Солтүстік-Батыс құбыр компаниясы (СЗТК), оның құрылтайшылары – «ҚазТрансОйл» (51%) және CNPC (49%).
Жаңа тариф — 1000 км-ге 1 тонна үшін 11 193 теңге (ҚҚС-сыз). Бұл тариф келесі 5 жыл ішінде жыл сайын индекстеліп отырады.
Осылайша, ішкі нарықтағы жаңа тариф экспорттық тарифке жуықтады. Естеріңізге салсақ, 2025 жылғы 19 мамырдан бастап экспорттық тариф екі есеге артқан болатын: 1 тонна үшін 1000 км қашықтыққа 5 912 теңгеден 11 300 теңгеге дейін (ҚҚС-сыз).
Бір апта бұрын бұл жөнінде хабарлай отырып, «ҚазТрансОйл» «МұнайТас» арқылы тасымалданатын мұнай көлемінің негізгі бөлігі ішкі нарыққа бағытталғанын атап өткен еді. Ол кезде жаңа тариф тек экспорттық бағыттарға қатысты деп мәлімделген болатын.
Алайда енді бұл жоғарылату ішкі тарифке де әсер етті. Айта кету керек, ішкі тариф 2012 жылдан бері қайта қаралмаған. Компания мұнайды ішкі нарықтағы мұнай өңдеу зауыттарына тасымалдау құнының өсуін «Ішкі нарыққа мұнай айдау қызметтері үшін “Инвестицияға айырбас ретінде тариф” қағидаты бойынша ынталандырушы тарифтеу әдісін енгізумен» түсіндіреді.
Бұл тарифтің көтерілуі 2025 жылдың І тоқсанында «ҚазТрансОйл» қызметтерінің өзіндік құнының 5,8%-ға өсуі аясында орын алып отыр. Нәтижесінде, осы кезеңде компанияның таза пайдасы 12,9%-ға төмендеген.