Қазақстанда Ұлы Отан соғысының 111 ардагері Жеңістің 80 жылдығын атап өтеді

Қазақстанда Ұлы Отан соғысының 111 ардагері нацистік Германияны жеңген Жеңістің 80 жылдығын атап өтеді, деп хабарлады ҚР Еңбек және халықты әлеуметтік қорғау министрлігінің баспасөз қызметі.

Министрліктің мәліметінше, 2025 жылдың 1 сәуіріндегі жағдай бойынша елде:

• Ұлы Отан соғысының 111 ардагері;
• Жеңілдіктері бойынша ҰОС ардагерлеріне теңестірілген 16 796 адам;
• Басқа мемлекеттер аумағындағы ұрыс қимылдарына қатысқан 26 553 адам;
• ҰОС жылдарындағы тыл еңбеккерлері  - 39 588 адам тұрады.

Жалпы алғанда, Қазақстанда әртүрлі санаттағы 83 048 ардагер бар.

Бұған дейін, қаңтар айында, Президент Қасым-Жомарт Тоқаев Жеңіс күніне арналған әскери парадты мерейтойлық жылдың басты оқиғасы ретінде атап өткен болатын. Ол 7 мамырда Астанада өтеді және 2019 жылдан бері алғаш рет ұйымдастырылмақ.

Ұлы Отан соғысы кезінде Қазақ КСР-інен майданға 1,2 миллионнан астам адам шақырылды. Шамамен 500 қазақстандық Кеңес Одағының Батыры атанды, олардың төртеуі екі мәрте батыр атағын алды, 110 жауынгер Даңқ орденінің үш дәрежесімен марапатталды. Қолына қару алған әрбір екінші қазақстандық Жеңіс үшін өмірін қиды. Тұтқыннан 630 мың адам оралмады.