Мәжіліс Салық кодексінің жобасын бірінші оқылымда мақұлдады

Қазақстан Парламенті Мәжілісінің депутаттары жаңа Салық кодексінің жобасын бірінші оқылымда мақұлдады. Құжат салықтарды оңтайландыру және салықтық жеңілдіктерді енгізу шараларын қамтиды.

Кодексте:

• Салықтар мен төлемдердің саны қысқартылады, ал корпоративтік табыс салығының мөлшерлемесі:
  • Банк секторында – 25%,
  • Ойын бизнесінде – 25%,
  • Әлеуметтік секторда – 10%,
  • Өңдеу өнеркәсібінде – 10%,
  • Ауыл шаруашылығында – 3% болып белгіленеді. Базалық ставка 20% деңгейінде сақталады.
• Арнайы салық режимдері оңтайландырылып, олардың саны үшеуге қысқарады. Олар: оңайлатылған декларация негізінде, өзін-өзі жұмыспен қамтығандар мен шаруа қожалықтарына қатысты болады.

Жеке тұлғаларға қатысты:

• Бірыңғай жинақтаушы зейнетақы қорынан төленетін зейнетақы төлемдері жеке табыс салығынан босатылмақ.
• Республикалық бюджет туралы заңға сәйкес, 30 АЕК мөлшерінде жалақыдан базалық салық шегерімі белгіленеді.

Автокөлікке қатысты:

• 10 жылдан асқан көліктерге салық көлемі 30%-ға, ал 20 жылдан асқан көліктерге 50%-ға азайтылуы қарастырылған.

Жеке тұлғалардың бағалы қағаздармен мәмілелерден түскен табысына салық салу тәртібі де қайта қарастырылуда.