В Атырау
+22 
Грузия астанасы Тбилисиде, Шота Руставели даңғылында, кеше кешке наразылық акциясы қайта басталды, деп хабарлайды АА.
Наразылық білдірушілер, үздіксіз 131 күн бойы парламент ғимаратының алдында жиналып, автокөлік жолын жауып тастады.
Олардың жаңа сайлау өткізу және акциялар кезінде ұсталғандарды босату. талаптары өзгеріссіз қалды.
Сонымен қатар, Қоғамдық хабар тарату ғимаратының алдында акция өтті, одан кейін шерушілер Руставели даңғылына дейін жүріп, негізгі акцияға қосылды.
Бұл наразылықтар Грузия үкіметі Еуропалық Одаққа кіру бойынша келіссөздерді тоқтатқаннан кейін басталып, 130 күннен астам уақыт бойы жалғасып келеді.
2024 жылдың 28 қарашасында премьер-министр Ираклий Кобахидзе ЕО-ны бопсалауда айыптап, еуроинтеграция процесі төрт жылға тоқтатылатынын мәлімдеді. Бұл мәлімдеме Грузия мен Батыс арасындағы қарым-қатынастарда шиеленіс тудырды.
Қараша мен желтоқсан айларындағыдай көп адам жиналмаса да, наразылық білдірушілер Тбилисидің көшелеріне шығып, парламент маңындағы жолдарды жауып жатыр. Осындай наразылық акциялары Батуми қаласында да өтуде.
Қатысушылар мерзімінен бұрын парламенттік сайлау өткізуді талап етуде.
ЕО мен АҚШ-тың бірқатар шенеуніктері наразылық білдірушілерді қолдады, ал полициямен қақтығыстар кезінде ұсталғандар әлі де қамауда отыр.
ЕО елдерінің көпшілігі (Венгрия мен Словакиядан басқа), АҚШ, сондай-ақ Грузияның экс-президенті Саломе Зурабишвили мен оппозициялық партиялар 2024 жылдың 26 қазанында өткен парламенттік сайлау нәтижелерін мойындамай, үкіметтің ЕО-мен келіссөздерді тоқтату туралы шешіміне қарсы шықты.
Өз кезегінде билік Батыс елдерін, Зурабишвилиді және оппозицияны «көшедегі наразылықтар арқылы жағдайды тұрақсыздандыруға және үкіметті құлатуға тырысты» деп айыптады.