​Қытай АҚШ тарифтеріне қарсы мәлімдеме жасады

Қытай АҚШ президенті Дональд Трамптың 50%-дық қосымша тарифтер енгізу туралы қоқан-лоққысына жауап ретінде шешімді қарсы шаралар алатынын мәлімдеді, деп хабарлайды АА. 

Қытайдың Сауда министрлігі Вашингтонның кедендік тарифтерді арттыруына қарсы екенін және сауда шектеулерін күшейтуге бағытталған кез келген әрекеттерге қарсы тұратынын атап өтті.

Министрлік АҚШ-тың тарифтік саясатын қате деп санап, бұл әрекеттерді қысым көрсету мен мәжбүрлеу деп бағалады. Егер АҚШ осы бағытта жалғастыра берсе, Қытай қатаң және шешімді жауап қайтаратынын мәлімдеді.

Қытайдың Халық банкі қажет болған жағдайда капитал нарығындағы тұрақтылықты қамтамасыз ету үшін қайта қаржыландыру түрінде қосымша қолдау көрсетілетінін айтты. Сонымен қатар, Қытайдың Суверенді инвестициялық қорының еншілес компаниясы Central Huijin қытайлық қор биржаларында акцияларды сатып алуды жалғастыратынын мәлімдеді.

Дональд Трамптың тарифтер енгізу туралы мәлімдемесінен кейін Қытайдағы қор нарықтары төмендеп, азиялық биржалардың құлдырауын қайталады. Қытай бұл жағдайды Дүниежүзілік сауда ұйымының (ДСҰ) ережелерін бұзу деп бағалап, АҚШ-тың әрекеттеріне қарсы шағым түсірді.

Қытайдың жауабы АҚШ президенті Дональд Трамптың «өзара баж салығы» саясаты аясында қытайлық тауарларға қосымша баж салығын енгізу туралы мәлімдемесінен кейін жасалды.

2 сәуірде АҚШ президенті Дональд Трамп импорттық баж салығының жаңа жүйесі енгізілгенін мәлімдеді. Елге әкелінетін барлық тауарлардың базалық мөлшерлемесі 10 пайызды құрайды. Дегенмен, баждар кедендік тарифтерді және «саудадағы басқа да ақшалай емес кедергілерді және алаяқтық нысандарын» ескере отырып, елге байланысты өзгереді. Атап айтқанда, Қытайға 34 пайыздық баж салығы енгізілуде.

4 сәуірде Пекин Вашингтонның тарифтеріне жауап ретінде АҚШ импортына қосымша 34 пайыздық баж салығын енгізетінін мәлімдеді.

Қытай мемлекеттік кеңесінің мәлімдемесінде АҚШ-тан әкелінетін барлық тауарларға ағымдағы 34 пайыздық баж салығын қосымша енгізетінін айтты. Баждар 10 сәуірден бастап күшіне енетіні атап өтілді.

Қытайдың Сауда министрлігі баж салығының көтерілуі ДСҰ ережелерін елеулі түрде бұзады, ДСҰ мүшелерінің заңды құқықтары мен мүдделеріне елеулі зиян келтіреді және ережелерге негізделген көпжақты сауда жүйесін бұзады деп мәлімдеді.

Баж салығын көтерумен қатар Қытай билігі американдық 27 компанияның экспорттық бақылау тізіміне қосылғанын хабарлады. Он алты компания қос мақсаттағы өнімдердің экспортын бақылау үшін тізімге енгізілген.