​Мерекелік дастарханға қандай ас қойған дұрыс?

Медициналық статистика мереке күндері тамақтан улану жағдайларының көп болатынын көрсетеді. Бұл ең алдымен адамның мереке күндері әдеттегіден артық тамақ ішетіндігіне және тағамдардың бірнеше күн сақталатынына байланысты. Сондықтан тамақтан уланбау үшін қандай қарапайым сақтық шараларын ұстанған жөн, деп жазады 24.kz.

- Ең алдымен мерекелік қарбалас күні уақытымен тамақтануды ұмытпау қажет. Әдетте бар күшімізді кешкі дастархан әзірлеуге жұмсап, асқазанды ауыр тағамдарға дайындап алуды ескермейміз. Ал оның кері әсері орасан зор, - дейді гастроэнтеролог Бақытжан Бейімбетов. - Жаңажылдық дастарханға ашқұрсақ отырған дұрыс емес. Оның алдында 1-1,5 сағат жүрек жалғау керек дейді ғой. Аз ғана тамақтанып, ашықпау жағын ойлау керек. Егер ашқұрсақ дастарханға отырсақ, тамақты көп жеп қоюымыз мүмкін. 

Екіншіден ас та төк тамақ жаңа жылдың басты сәні емес. Күні бойы тек дастархан қамымен жүрмей, бойды сергітіп, асқазанды жеңілдетуге көмектесетін түрлі отбасылық шоу-бағдарламалар ұйымдастыруға да мән берген жөн. 

Гауһар Серікқалиқызы, диетолог: 

- Жаңа жыл деген ол көбінесе эмоция ғой. Отбасымызбен жақсы көңіл-күйде отырып, жақсы араласып, тек қана дастархан басында отыра бермей, бір рет тамағымызды жеп, жүріп, ойын ойнап, жанұямызбен шоу-бағдарлама жасайық, сонда жақсы болады. 

Диетологтар жаңа жыл түні табиғи коллаген мен ақуызға бай тіскебасарлар және дәрумені көп қызылшадан түрлі салат жасауға кеңес береді. Ыстық тамаққа балық жеген дұрыс. Бұл талапты әсіресе мейрамханадағы кәсіби  аспаздар ескеруге тырысады. 

Сандуғаш Сағындықова, бас аспаз: 

- Бізде көптеген организмге пайдалы шөптерден түрлі салаттар жасалады. Содан кейін бешбармақ немесе бұқтырылған сиыр етін алады. Бірінші ыстық тағамға, ал екінші тағамға балық стейгін дайындаймыз.