В Атырау +20.8 
Ағымдағы жылдың 17 желтоқсанында Сыбайлас жемқорлыққа қарсы іс-қимыл агенттігінің Төрағасы Асхат Жұмағали Ресей Федерациясының Қазақстандағы Төтенше және Өкілетті Елшісі Алексей Николаевич Бородавкинмен екіжақты кездесу өткізді, деп хабарлайды Антикор.
Кездесу барысында екі ел арасындағы жемқорлыққа қарсы іс-қимыл саласындағы ынтымақтастық мәселелері талқыланды.
Сыбайлас жемқорлықтың алдын алу, трансұлттық жемқорлық схемаларына қарсы күрес және қылмыстық қудалаудың тиімділігін арттыру жөніндегі шараларды одан әрі жетілдіру перспективаларына ерекше назар аударылды.
Сондай-ақ, екіжақты қатынастар шеңберінде тәжірибе алмасу және бірлескен бастамаларды іске асыру мәселелері қозғалды.
Асхат Жұмағали ТМД елдерінің Мемлекетаралық кеңесі шеңберінде сыбайлас жемқорлыққа қарсы іс-қимыл функцияларын жүзеге асыратын Ресей Федерациясының Бас прокуратурасымен одан әрі өзара іс-қимылдың маңыздылығын атап өтті.
Аталған институт өзекті сын-қатерлерді бірлесіп шешу және өңіраралық ынтымақтастықты нығайту үшін кең мүмкіндіктер ұсынады.
Кездесу қорытындысы бойынша жемқорлыққа қарсы саясаттың тиімділігін арттыруға бағытталған күш-жігерді үйлестіруді және бірлескен жобаларды іске асыруды жалғастыруға өзара ұмтылыс білдірілді.