Дүниежүзілік көшпенділер ойындарында бүгін қандай жарыстар өтеді

Астанада өтіп жатқан V Дүниежүзілік көшпенділер ойындарында бүгін ұлттық құрама спортшылары қандай жарыстарға қатысатыны белгілі болды, деп хабарлайды Azattyq Rýhy ұлттық және ат спорты түрлері орталығының» баспасөз қызметіне сілтеме жасап.

Сағат 11.00-де көкпардан Қазақстан ұлттық құрамасы Қырғызстан командасымен кездесіп, алтын жүлдені сарапқа салады. Ойын «Қазанат» ипподромында өтеді.

Ипподромда сағат 16.30-да көк бөріден Қазақстан мен Қырғызстан арасында финалдық матч басталады.

Ал ипподром жанындағы этноауылда сағат 10.00-де теңге ілуден жарыс басталады. Бес белес сайысынан Бекнұр Серіков өнер көрсетеді. Бес белес – 15:00-те іріктеу сайысы және финалдық бөлім. Ал сағат 15.00-де Рахат Қамбаров қос құлаш сайысы бойынша сынға түседі.

Этноауылда сағат 10.00-де құсбегілік жарысы басталады. Бүркіт, қаршыға және сұңқар салу іріктеу кезеңі мен жартылай финал өтеді. Бүркіт салудан Ерзат Байқадамов, Серікбек Күнтуған, Арман Қошқаров, ал қаршыға салудан Дәурен Аршабай, Бағдат Кеуенов, Құдайберген Рауилұлы, Ерлан Кенжетаев, ителгі салудан Бақдәулет Бабажан мен Ибрагим Базарбаев сынға түседі.

«Арғымақ» ат-спорт кешенінде сағат 10.00-де дәстүрлі садақ атудан командалық сайыс басталады. Қазақстан намысын 10 спортшы қорғайды. Әйелдер: Динара Жақсылықова, Фариза Сабыржан, Айкөркем Батихан және Ажар Төлеуқанова. Ерлер: Ербол Тәпенов, Бақберген Сәлімов, Қасымхан Қанат, Марат Бексұлтан, Мақсат Әбдікерімов және Жәнібек Құлмырзаев.

Жақсылық Үшкемпіров атындағы Жекпе-жек сарайында сағат 10.00-де татар халқының көне ұлттық белбеу күресі корэштен ерлер арасында төрт салмақ дәрежесі бойынша жарыстар басталады. Ел намысын Әділет Шалғынбекұлы (64 келі), Бекнұр Бектай (75 келі), Ернар Байжігіт (90 келі) және Нұрсұлтан Қожагелдіұлы (+90 келі) қорғайды.

«Алау» мұз сарайында сағат 10.00-де түрік халқының ұлттық күресі ашыртмалы аба гюрешінен бес салмақ дәрежесі бойынша жарыс басталады. Ұлттық құрама сапында Марат Нигматуллаев (60 келі), Әділет Ахметғали (70 келі), Ерзат Арғынов (80 келі), Айдос Ғалымов (90 келі) және Мұхтар Дәлелханұлы (+90 келі) бозкілемге шығады. Ашыртмалы аба гюрешине 19 мемлекеттен 74 спортшы қатысады.

«Алау» мұз сарайында сағат 10.00-де қырғыз халқының ұлттық ойыны ордодан іріктеу сыны басталады. Ел намысын НұржігітАнуарбекұлы, Нұрқанат Молжігітов, Алмас Қарабаев, Мұхамбетжан Нұрланұлы, МырзамұратКайыпбеков, Айбек Амангелдіұлы. Талғар Әбілхан және Салмоорбек Субаналиев қорғайды. Ордоға 7 мемлекеттен 56 спортшы қатысады. Ақтық кезең 13 қыркүйек күні өтеді.

«Думан» қонақ үй және спорт кешенінде сағат 10.00-де Батыс Африка халықтарының зияткерлік ойыны овариден сайыс басталады. Овариден ұлттық құрама сапында Әсел Далиева, Аңсаған Қожанәсіп, Серік Ақтаев және Ернұр Мерешев Бексұлтан Бостандықов, Ерсұлтан Әуелбай, Мөлдір Серікқызы және Қожанасыр сынға түседі.

Еске сала кетсек, Дүниежүзілік көшпенділер ойындарында ұлттық құрама 69 медаль еншіледі.  Жалпы есепте Қазақстан қоржынында 27 алтын, 17 күміс, 25 қола жүлде бар. Ұлттық құрама спортшылары төртінші жарыс күнінде 6 алтын, 7 күміс, 8 қола жүлде жеңіп алды.