Атырау, 25 қараша 10:52
 жаңбыр жаууы ықтимал В Атырау 0
$ 424.49
€ 504.51
₽ 5.59

Даланы ластаған саңылау

3 781 рет қаралды

ТЖМ Құрманғазы ауданының Сарышағыл-4 учаскесіндегі иесіз ұңғылар маңынан алаңы 600 шаршы метр болатын мұнай дағы табылғандығы туралы хабарлады.

ТЖ бөлімінен хабарлағандай, Құрманғазы ауданының Сарышағыл-4 учаскесі Октябрь кенішімен шектесіп жатыр, Ақтөбе-Астрахан тас жолының 805 шақырымынан оңтүстікке қарай 10-шақырымында орналасқан.  

Ұңғыны тексеріп шыққан Исатай ауданының экология инспекторы Қажығали НАУАНОВТЫҢ айтуынша, оны 80-ші жылдары бұрғылаған екен. Кейіннен оны тоқтатып тастаған. Қазір ұңғы қараусыз қалыпты.

Ұңғы төңірегіне мазут төгілгені туралы біз өкілетті органға үш жыл бұрын хабарлаған едік. Облыстық геология және жер қойнауын пайдалану инспекциясындағылар бізге Сарышағыл-4 маңындағы ұңғыны өздігінен төгілетін ұңғылар тізіміне енгізетінін хабарлады. Біз осыдан кейін оны жояды деп ойлаған едік, бірақ олай болмады, - дейді Қ. Науанов.

2010 жылы жүргізілген тексеру нәтижелері бойынша облыс аумағында 89 апатты, соның ішінде өздігінен төгілетін ұңғылар болды. Оның 88-і мұнай компанияларының келісімшарттық аумақтарында орналасқан, тек Сарышағыл-4 учаскесінде орналасқан біреуінің баланста ұстаушысы жоқ, - деп хабарлады геология және жер қойнауын пайдалану инспекциясының бастығы Құттығали НАУКИЕВ.  Мәселен, 2012 жылы «ЕмбіМұнайГаз» ӨФ 71 апатты ұңғыны жойды. 2004-2009 жылдар аралығында облыс бойынша республикалық бюджет есебінен 57 ұңғы: 9-ы – құрлықта, 48-і – Каспий теңізінің су басқан аймағында жойылды. Сарышағыл-4 ұңғысы да мемлекеттік бюджет есебінен жойылуы тиіс.

Құрманғазы даласын әрі қарайғы ластанудан кім құтқарады? Мұнайшылар арасында облыстық прокуратура «Ақберен» бұрқаққа қарсы қызмет филиалына «саңылауды» бітеуге тапсырма берді деген сыбыс таралды.

Біз сол жерге барып, шынымен де, мұнайдың төгіліп жатқанына көз жеткіздік. Қожайынын іздей бастадық, бірақ таппадық. Бізбен келісімшарт жасайтын ешкім болмағаны ғой. Біз мұндай жағдайда жұмыс істей алмаймыз, - дейді «Ақберен» қызметі директорының міндетін атқарушы Амандық ДАУЫЛБАЕВ.

Ал мұнай бұрынғыша төгіліп жатыр. 

Мұрат СҰЛТАНҒАЛИЕВ

6 маусым 2013, 00:00

Қате таптыңыз ба? Тінтуірмен белгілеп, Ctrl + Enter түймесін басыңыз.

Осы мақала тақырыбына қатысты ой-пікіріңізбен бөлісіп, бейнежазба жолдағыңыз келсе, WhatsApp +7 707 37 300 37 нөміріне және editors@azh.kz поштасына жібере аласыз.