Қырғызстанда мемлекеттік туды өзгерту туралы шешім қабылданды

Қырғызстан парламенті мемлекеттік туды өзгерту туралы заң жобасын үш оқылымда талқылаусыз қабылдады, - деп хабарлайды "Адырна" порталы 24.kg сайтына сілтеме жасап.

Заң жобасын қабылдауға 59 депутат дауыс берсе, 5-і қарсы болды.

Парламент спикері Нұрланбек Шәкиев әріптестерін құттықтады.

"Құрметті депутаттар! Жаңа ту құтты болсын! Бұл өзгеріс емес, бұл өңдеулер. "Аңызға айналған парламент" туралы үнемі қайталаудың қажеті жоқ. Әр кезеңнің өз аңызы бар", - деді ол.

Конституциялық заңнама, мемлекеттік құрылым, сот-құқықтық мәселелер және регламент комитетінің төрайымы Чолпон Сұлтанбекова заң жобасын екінші және үшінші оқылымда дауыс беруге парламенттік алты фракция мақұлдағанын айтты.

Еске сала кетейік, туды өзгерту идеясы Қырғызстан президенті Садыр Жапаровқа тиесілі. Заң жобасының бастамашылары – Жогорку Кенеш спикері Нұрланбек Шәкиев пен депутат Ұлан Пірімов. Сәулелердің пішінін толқындыдан түзу етіп өзгерту ұсынылды. Құжат авторлары туды өзгертуге республикалық бюджеттен шығын әкелмейтінін атап өтті.

Қырғызстан туының ағымдағы нұсқасы (жоғарғы) және ұсынылған нұсқасы (төменгі) /24.kg

Өткен демалыста өткен Халық құрылтайында президент Садыр Жапаров бұл өз идеясы екенін мойындады. Ол Парламент спикерінен заң жобасына бастамашылық етуді сұрады.

Ұлттық қауіпсіздік комитетінің төрағасы Қамшыбек Ташиев те бұл өзгерісті қолдап: «Ту күнбағысқа ұқсамай, жарқыраған күннің бейнесін беруі керек» деді.