Атырау университетінің базасында республикалық физика-математика мектебінің филиалы ашылады

С. Өтебаев атындағы Атырау мұнай және газ университеті мен Қазақстанның Республикалық физика-математика мектебі өзара тиімді ынтымақтастық туралы меморандумға қол қойды, деп хабарлайды Ғылым және жоғары білім министрлігінің баспасөз қызметі.

Кездесу барысында С.Өтебаев атындағы АтМГУ-нің базасында Республикалық физика-математика мектебі (РФММ) КЕАҚ филиалын ашу туралы келісім жасалды. Бұл қадам студенттер мен оқушылардың білім беру және ғылыми мүмкіндіктерін кеңейтуге, сондай-ақ қолайлы білім беру ортасын құруға бағытталған.

Ынтымақтастықтың негізгі мақсаты – физмат және АтМГУ білім беру, ғылыми, инновациялық және технологиялық әлеуетін біріктіру арқылы қызметкерлердің үздіксіз кәсіби дамуын қамтамасыз ету.

Екі жақтың интеграциясы білім беру кластерлерінің қалыптасуына негіз жасайды, онда білім беру мекемелері аймақта сапалы және жан-жақты білім беруді қамтамасыз ету үшін күш-жігерін шоғырландырады.

Физмат және АтМГУ бірлескен қызметі университеттер мен мектептер арасындағы ғылыми зерттеулер саласында өзара тығыз әрекеттесу үшін жағдай жасайды. Бұл студенттердің ғылымға деген қызығушылығын оятуы мүмкін.